Gaguritan Bhimaniyu inggih punika gaguritan sané nyritayang indik Sang Bhimaniyu putran Sang Arjuna miwah Dewi Subradra. Geguritan Bhimaniyu kawangun antuk makudang-kudang pupuh minakadi pupuh demung, pupuh sinom, pupuh ginada miwah pupuh pangkur.[1]
Ring pangawit gaguritan nyritayang akedik indik kahanan Sang Pandawa sané kalah majudi sareng Sang Korawa. Punika ngawinang Sang Pandawa ngranjing ka tengahing alas roras tiban laminyane. Gaguritan punika raris nyritayang indik Sang Bhimaniyu kasayangan pisan olih Sang Kresna. Ida Sang Kresna ngadeg ratu ring Dwarawati. Ida Sang Kresna madué oka istri mapesengan Siti Sundari. Ibunnyané Dyah Rukmini. Siti Sundari miwah Abimaniyu madué kayun pacang masikian.
