Gaguritan Anak Bekung

Gaguritan Anak Bekung
Wikipustaka
Aran liyanan	gĕguritan·​hanak·​bĕkuŋ
Kawedar kapertama ring	Kalurahan Karangasem
Basa(-basa)	Basa Kawi
Lakaran	Lontar
Ukuran	45 cm x 3,3 cm
Format	Gaguritan
Aksara	Aksara Bali
Lempir	35
Ngranjing Koleksi ring	Kapustakaan Kantor Dokuméntasi Budaya Bali
Klasifikasi Gedong Kirtya	Tantri

Gaguritan Anak Bekung inggih punika silih tunggil kakawian tradisional Bali marupa tembang sané nganggén pupuh ginada tur nyritayang indik Pan Bekung miwah Men Bekung sané tiwas tur nenten ngelah pianak.

Ringkasan Carita

Kacrita pan Bekung miwah Men Bekung geginane sawai-wai tuah madagang pamor. Nyama brayane pada ngutang, tusing ada olas tekén Pan Bekung miwah Men Bekung. Sedek dina anu, Men bekung ngidih tulung tekén misan, mindon miwah brayané. Nanging tusing ada ané nyak nulungin, ada nagih mangebug, maninjak, len nunggingin, ada ngubetin jelanan, makejang ngedégin tuara ada mangrunguang. Nuju purnama kapat, Men Bekung nyluksuk ka alase ngalih don, sayan katengah sayan akeh donné katepuk. Ditu lantas Men Bekung maan nuduk raré lanang bagus pisan tur kaajak mulih. Raréné ento kaadanin Bagus Turunan. Sasukat maan nuduk raré, Pan Bekung miwah Men Bekung dadi sugih, tuara kuangan apa.

Patbelas tiban sampun liwat, Bagus Turunan sampun kelih dadi anak truna bagus, dueg makidung tur makakawin. Liu anak luh buduh paling tekén Bagus Turunan nanging tusing ada manut ring kenehné Bagus Turunan. Nuju purnama kapat, Bagus Turunan makuramas tur masisig, mangesti rahina melah, lawut sirep. Sawatara dauh pat, saget dané mangipi. Ngipi mangisi bulan, ulung di pabinan raris dados putri ayu. Bagus Turunan kasemaran raris mapikayun pacang ngrereh putriné punika. Pan Bekung miwah Men Bekung katunden ngoyong jumah, ngawasang tunjung sané kembang di tengah danuné. Bagus Turunan mabesen, yéning tunjungé layu kapanasan, punika makaciri Bagus Turunan sampun seda. Nanging yéning tunjungé tileh kembang, punika makaciri Bagus Turunan kari urip.

Bagus Turunan raris mamargi ngaja kanginang ngaliwatin alas. Sesampune prapti ring Kadiri, Bagus Turunan nyingakin putri sané karereh inggih punika Radén Galuh Kadiri. Dané sedek masiram tur makuramas ring telagané kairing olih Condong Bayan tur wong jero puri, akéhnyané telung dasa reko. Bagus Turunan miwah Radén Galuh pada saling tresna tur cumpu pacang matemu malih tigang rahina. Bagus Turunan masemaya pacang ngrereh Radén Galuh malih tigang rahina raris dané budal. Sampun lawas tigang rahina, Bagus Turunan prasida kacunduk sareng Radén Galuh raris kairing ka jumahné Bagus Turunan. Sang Prabu sané uning okan dané ical saking puri, raris ngutus patih miwah demung mangda ngrereh okanné. Pamuputné Sang Prabu cumpu indik okanné kaambil olih Bagus Turunan.

Pragina

• Pan Bekung
• Men Bekung
• Bagus Turunan
• Raden Galuh Kadiri