Kakawin

Kakawin utawi sekar agung inggih punika tembang Baline sané kabanda antuk uger-uger Guru, Laghu, Wretta, miwah matra. Guru mateges suara abot, suara lantang, suara ngileg utawi kecape sané katembangan molah, panjang ngawilet. Guru kapalih dados tiga inggih punika: guru Haswa (guru bawak), Guru dirgha (guru panjang), miwah Guru pluta (guru panjang tur ngileg). Laghu mateges suara ingan, suara bawak, suara nylocor utawi kecape sané katembangan antar bawak. Wretta mateges kecap wanda utawi gebogan wanda sajeroning acarik. Matra mateges pawangun gurulaghu sajeroning acarik.

Sajeroning apada wirama kawangun antuk petang carik, sakewanten wénten taler pada wirama sané kawangun antuk tigang carik sané kabaos Rahitiga utawi Utgatawisama. Carik kapertama sajeroning wirama kabaos Pangawit, carik kaping kalih kabos Pangenter, carik kaping tiga kawatanin Pangumbang, miwah carik kaping pat kawastanin Pamada. Ring wirama Raitiga nenten wénten Pengenter.

Ring sor puniki kabaosang makudang-kudang murdan kakawin:

1. Kakawin Ramayana kakawi antuk “Mpu Yogiswara”
2. Kakawin Bharatayudha kakawi antuk “Mpu Sedah miwah Mpu Panuluh”
3. Kakawin Arjuna Wiwaha kakawi antuk “Umpu Kanwa”
4. Kakawin Sutasoma kakawi antuk “Mpu Tantular”
5. Kakawin Siwalatrikalpa kakawi antuk “Mpu Tanakung”