Pura Andakasa
| Pura Luhur Andakasa | |
|---|---|
 | |
| Inpormasi umum | |
| Tipe | Pura |
| Pakem Undagi | Bali |
| Genah | Angantelu, Karangasem, Bali |
| Margi | Angantelu, Manggis, Karangasém, Bali 80871 |
| Koordinat | 8°18′45″S 115°17′00″E / 8.312536°S 115.283281°E |
| Estimasi puput | Abad ka-11 |
Pura Andakasa inggih punika pura sané magenah ring wewidangan Désa Angantelu, Kecamatan Manggis, Kabupatén Karangasem. Kawéntenan pura punika wantah ring sisi kelod Pulo Baliné. Manados saking konsep Padmabhuwana sané kapuja ring Pura Andakasa wantah Déwa Brahma utawi Ida Sang Hyang Tugu satmaka sang sané ngripta sakancan kahuripan ring jagaté. Manut lontar Kusumadéwa kawangun olih Mpu Kuturan utawi Mpu Raja Kerta sané taler ngaryanin konsép Kahyangan Tiga mangda sekte-sekte ring sajebag jagat Bali satate rumaket. Sané lianan, pura punika taler mapaiketan sareng Empu Sang Kulputih, brahmana sané nglaksanayang tapa brata drika sadurung ida nglanturang tirta yatra nuju Pura Besakih miwah Lempuyang. Ida taler manados pemangku agung ring Pura Besakih sané mapuspata Empu Sweta Wijaya. Piodalan ring Pura Andakasa kalaksanayang nyabran nem sasih nemonin Anggara Kliwon wuku Medangsia. Ring pura punika taler kalaksanayang ngaturang caru ring rahina Anggara ri tatkala wuku Kulantir, Prangbakat miwah Dukut.