Pura Dalem Pingit Sebatu
| Pura Dalem Pingit Sebatu | |
|---|---|
 Panglukatan Pura Dalem Pingit Sebatu | |
 | |
| Inpormasi umum | |
| Tipe | Pura |
| Pakem Undagi | Bali |
| Genah | Désa Sebatu |
| Margi | Desa Sebatu, Tegallalang, Kabupaten Gianyar, Bali 80561 |
| Koordinat | 8°23′57″S 115°17′34″E / 8.399226308574578°S 115.29291298680624°EKoordinat: 8°23′57″S 115°17′34″E / 8.399226308574578°S 115.29291298680624°E |
Pura Dalem Pingit inggih punika pura sané magenah ring Désa Sebatu, Tegallalang, Gianyar. Pura puniki sampun wénten ring jaman Mayadénawa. Pura Dalem Pingit Sebatu kasungsung olih sawatara 490 kulawarga tur kasuciang. Wénten makudang-kudang peraturan sané patut kalaksanayang olih para kramané, sakadi nénten dados ngranjing ka pura nganggén sandal tur nénten dados nganggén perhiasan ri tatkala mabakti. Lianan saking punika, para kramané taler nénten dados ngaturang banten sané madaging minyak utawi kagoréng. Nika mawinan para kramané patut ngaturang banten sané kakukus sakadi bolu utawi kué. Aturan lianan inggih punika, krama asli irika patut nglaksanayang upakara Perebuan, sané kalaksanayang olih anak sané sampun ménék kelih. Krama sané durung nglaksanayang upakara Perebuan, nénten dados ngranjing ring pura punika. Aturan punika mawiguna antuk nyaga kasucian pura. Ring pura punika kaprecaya wénten genah matapa saking Déwa Siwa miwah Déwi Durga.[1]
Pura Dalem Pingit inggih punika pahan saking Pura Kahyangan Tiga sané magenah ring hilir Désa Adat Sebatu. Genahnyané ring tengahing alas doh saking genah meneng para kramané. Ring jaba pura wénten palinggih Ratu Penyarikan, ring mandala tengah wénten kalih balé jajar (balé patemon), miwah ring mandala utama wénten palinggih Bhatara Dalem, Ratu Ngerurah, miwah wénten Balé Pingit. Balé Pingit sané ring Mandala Utama kaanggén dados genah pasucian Ida Bhatara Dalem ri tatkala nglaksanayang Usaba Dalem. Ring genah puniki para kramaně nunas tirta antuk nyuciang makasami pratima ring Balé Pingit.
Piodalan[uah | uah wit]
Piodalan ring Pura Dalem Pingit kalaksanayang nyabran Tilem ring sasih Karo, ketahnyané masarengan sareng Upakara Walin Carik. Krana masarengan, upakara punika taler kasengguh Usaba Dalem sané kalaksanayang roras rahina. Wénten makudang-kudang upakara sané kalaksanayang, ngawit saking tradisi Nyacin Galungan miwah Nuncep Memedi. Genah puniki taler nénten nganggén sulinggih utawi rsi antuk muput upakara. Sané muput upakara inggih punika pemangku pura. Lianan saking punika, nénten dados nganggén tetabuhan, sakadi gong, genta, utawi bajra, krana ring pura punika nénten dados nganggén bahan tembaga. Nika mawinan ri tatkala upakara kalangsungang makasami ening.
Galéri[uah | uah wit]
Pustaka[uah | uah wit]
- ↑ Suyatra, I. Putu (2018-07-22). "Sembahyang di Pura Ini, Dilarang Pakai Perhiasan hingga Gorengan". Baliexpress (ring Indonesia). Kaaksés 2023-02-05.