Nyepi
Nyepi inggih punika silih tunggil rahinan jagat sané wénten ring Bali pinaka pagentos warsa anyar manut ring warsa Saka. Rahina Nyepi kalaksayanang ring pinanggal apisan Sasih Kadasa. Dudonan acara Nyepi sané jagi kalaksanayang ngawit saking kalih utawi tigang rahina sadurungnyané, punike jagi kamargiang upacara Melasti utawi Melis/Makiyis. Upacara punika kamargiang ngaturang upakara babantenan ring wit patoyan sané nampek ring désa pakraman soang-soang sakadi ring segara utawi danu utawi tukad.[1]
Bénjangnyané ring Tilem Sasih Kasanga umat Hinduné makarya caru manut ring tincapang upacara Butha Yadnya soang-soang. Ring rahina punika soréné taler jagi kamargiang Pangrupukan taler wénten ngarap ogoh-ogoh. Ogoh-ogoh irika pinaka cihna saking para butha mangda somia tur nénten ngusak-asik jadma sané wénten ring guminé, pamucuk ring ngemargiang brata ring rahina Nyepi.[2]
Ring rahina Nyepi kalaksanayang Catur Brata Penyepian sakadi: Amati Geni, Amati Karya, Amati Lelungan, miwah Amati Lelanguan. Apisan sasampun rahina Nyepi kawastanin Ngembak Geni pinaka sarana nglaksanayang Dharma Santi ring sameton soang-soang.[3]
Catur Brata Penyepian kakepah dados papat, inggih punika:
- Amati Geni: Ri kala rahina Nyepi punika tan dados maapi-mapian utawi ngendihang api miwah maplalian api, minakadi: ngranteng, malanjaran, ngendihang damar, miwah sané lian-lianan.
- Amati Karya: Ri kala rahina Nyepi tan dados pisan ngambil karya. Saluiring karya patut rarianang dumun, mangda teleb kayuné ngastawa ring Ida Sang Hyang Widhi Wasa.
- Amati Lelungan: Ri tepengan rahina Nyepi punika tan kapatutang ida dané malalungayan, makadi ngrauhin semeton, malancaran miwah sané lian-lianan. Cutet ipun tan dados medal nglangkungin pakarangan utawi margi.
- Amati Lelanguan: Ida dané tan dados maseneng-seneng, minakadi minum-inuman utawi maajengan, maplalian utawi main judi tan kapatutang pisan.
- ↑ "In Bali, a holiday for the ears". The New York Times.
- ↑ "Introspective Silence Befalls Bali, but Only for a Day". New York Times.
- ↑ "Pelaksanaan Hari Raya Nyepi di Indonésia". babadbali.com. Kaarsipin saking versi asli tanggal 2020-02-20. Kaaksés 2019-06-16.
