Galungan

Saking Wikipédia
Loncat ke navigasi Loncat ke pencarian
rahina Galungan lan Kuningan ring Pura.

Galungan inggih punika silih tunggil rahina jagat krama Hindu utamannyané ring Bali. Rahina punika kalaksanayang nyabran nem sasih utawi 210 rahina nuju Budha Kliwon wuku Dungulan. Galungan pinaka cihna indik dharma sané menang yéning kalawan antuk adharma. Manut lelintihannyané rahina punika taler simbol saking payudhan Déwa Indra (dharma) sané ngaonang raksasa Mayadenawa (adharma).

Dudonan rahina Galungan kakawitin antuk rahina Sugihan Jawa miwah Sugihan Bali. Sugihan Jawa kalaksanayang duk Wrespati Wagé wuku Sungsang, nem rahina sadurung Galungan pinaka sarana mareresik ring makasami sané wénten ring saluir Bhuana Agung. Limang rahina nuju Galungan ring Sukra Kliwon wuku Sungsang kabaos Sugihan Bali. Sugihan punika taler satmaka sarana mareresik ring sajeroning soang-soang padéwékan utawi Bhuana Alit.

Salanturnyané malih kalih rahina, ritatkala rahina Redité Paing wuku Dungulan kamargiang Penyekeban Galungan pinaka cihna nyekeb indriya. Benjangnyané wénten rahina Panyajahan Galungan. Manut kalénder Bali rahina punika kalaksanayang duk Soma Pon wuku Dungulan. Arahina sadurung Galungan kawastanin Penampahan Galungan. Ring rahina punika krama Hinduné makarya pénjor miwah sarwa ulam sané jagi kaanggén ring bebantenan sakadi saté, lawar, tum, bé kakak miwah sané lianan madasar siap utawi bawi. Ring rahina Budha, rahina sané pinih utama umat Hindu ring sajebag jagaté ngaturang sembah bhakti mawit saking paumahan soang-soang nglantur ka pura-pura ring sanè nampek ring wewidangan druwéné. Apisan sawusan rahina Galungan kabaos Umanis Galungan sané kalaksanayang nuju rahina Wrshpati Umanis wuku Dungulan. Pacang kalaksanayang Dharma Santi tur malancaran majeng ring pasemetonan jadmané soang-soang pinaka sarana ngrumaketang rasa masikian ring kulawarga.

Pustaka[uah | uah wit]