Cebur nuju daging

Tari Péndét

Saking Wikipédia
Pragina tari Péndét

Tari Péndét inggih punika silih tunggil sasolahan sané wénten ring Bali. Tari puniki wantah sasolahan panyambrama sané paling kapertama ring Bali. Tari péndét kakaryanin I Wayan Rindi dan Ni Ketut Reneng ring warsa 1950. Tari péndét kasolahang olih pragina istri sané makta bokor madaging bunga mawarna-warni. Pragina naburang bunga ka penonton pinaka panyambrama ring para tamiu. Baju sané kaanggén olih pragina ri tatkala nyolahang tari péndét inggih punika sabuk prada, songkét, anteng, miwah bokor. Seniman I Wayan Rindi miwah Ni Ketut Reneng, ngripta tari péndét panyanggra antuk petang diri pragina kanggén rikala nyanggra tamiu dura negara ring saluir hotel sané wénten ring Denpasar.[1]Raris ring warsa 1961, I Wayan Beratha nguningayang malih antuk ngwewehin akéh pragina tari péndét manados limang diri. Ring warsa 1962, I Wayan Beratha sareng timpal-timpalnyané ngaryanin tari péndét massal sané kasolahang olih pragina kirang langkung 800 diri sané kapéntasin ring pembukaan Asian Games ring Jakarta.[2]

Kawigunan miwah Piteket[uah | uah wit]

Tari Péndét dumun ketah kanggén pinaka sarana suci sajeroning pamargin upacara agama Hindu. Sadurungnyané, tari péndét kaanggén pinaka tari panyambrama rikala bhatara turun kabéh. Ring warsa 1961, tari puniki kauwah kawigunané olih I Wayan Beratha pinaka tari panyambrama majeng tamiu ring saluir parikrama, inggihan parikrama ring sekolah, pakraman, pamerintahan, miwah festival-festival. Ketahnyané, tari péndét kasolahang antuk pragina istri sawusan sasolahan tari rejang sané kalaksanayang ring tengahing pura. [3]

Piteket sané wénten ring tari pendet silih tunggilné pinaka atur rasa angayubagia majeng Ida Sang Hyang Widhi Wasa antuk saluir sané sampun kapica ring jagaté. Tiosan ring punika wénten taler teges tiosan inggih punika mapaiketan ring rasa suksma miwah dahating subagia rikala nyanggra tamiu sané sampun prasida rauh ring saluir parikrama/acara sané kalaksanayang. Sajeroning wiraga sané kasolahang olih para pragina, wénten taler piteket indik tata cara miara paiketan Tri HIta Karana inggihan parahyangan, pawongan, miwah palemahan. Piteket-piteket punika prasida kasaksiang malarapan antuk wiraga miwah semita/raras sang pragina sané nyinahang rasa dahat subagia.

Piranti Pragina[uah | uah wit]

Ring sor puniki, katlatarang soroh piranti sané kanggén olih pragina. [4]

  1. Bokor. Bokor sané kamuat rikala nyolahang tari péndét ketahnyané madaging sampian gonjer miwah sekar warna-warni. Bokor puniki kagisiang ring tangan tengen, saha tangan kiwa kanggén nyambehang sekar majeng tamiu sané sampun rauh ring saluir parikrama, sané pinaka cihna panyanggran.
  2. Kemben. Pragina tari péndét ketah nganggén kemben pinaka wastra, sané kakilitang ring awakné soang-soang. Kemben punika lumrahnyané mawarna barak miwah kuning emas, wénten taler sané mawarna dadu.
  3. Tapih. Tapih puniki kanggén sakadi kamben ring busana pragina.
  4. Gelungan. Gelungan sané kanggén ring tari péndét akéhan sané malakar aji ental, kapayasin antuk sekar-sekar sakadi cepaka,mawa, miwah jepun.
  5. Gelang. Gelah sané kanggén pinaka piranti wewehan sané ketah kanggén ring tangan tengen pragina.
  6. Ambed. Ambed sané kanggén ketah marupa ambed prada sané kakilitang ring sisin kemben saha kantos nglintangin pala sang pragina.

Pustaka[uah | uah wit]

  1. Anjani, Anatasia. "Tari Pendet: Ciri Khas, Pembagian Tempat Tari, dan Susunan Pemusik". detikedu (ring Indonesia). Kaaksés 2023-02-25.
  2. Kaya, Indonésia. "Tari Pendet : Kesenian - Situs Budaya Indonésia". IndonésiaKaya (ring Indonésia). Kaaksés 2020-03-08.CS1 maint: unrecognized language (link)
  3. Azizah, Laeli Nur (2021-10-06). "Sejarah Asal Tari Pendet dan Makna Tariannya - Gramedia". Gramedia Literasi (ring Indonesia). Kaaksés 2023-02-25.
  4. arofat (2020-02-15). "6 Properti Tari Pendet Lengkap Beserta Gambar Dan Deskripsi" (ring Indonesia). Kaaksés 2023-02-25.