Slamet Riyadi

Saking Wikipédia
Loncat ke navigasi Loncat ke pencarian
Slamet Riyadi

Ignatius Slamet Riyadi (Rijadi) inggih punika silih sinunggil Pahlawan Nasional Indonesia sané embas ring Surakarta tanggal 26 Juli 1927 tur padem ring Ambon 4 November 1950.

Ignatius Slamet Riyadi sadurungnyané mawasta Soekamto, embas ring Solo, Jawa Tengah pinanggal 26 Juli 1927. Rikala alit, dané ketah sungkan lantas magentos wasta dados Slamet. Rikala ngranjing ring SMP Negeri II Solo, olih gurunyané wastané kawewehin Riyadi krana dugas irika akéh sané mawasta Slamet. Sasampuné kelih, dané ngranjing pengajian ring Sekolah Pelayaran Tinggi (STP). Dané ngamolihang ijazah navigasi laut sasampuné dados lulusan peringkat kapertama antuk sané pinih becik. Krana prestasiné punika, Slamet Riyadi dados navigator kapal kayu sané malayar antar pulau ring Nusantara.

Silih tunggil parilaksana heroik antuk ngaperjuangang kamerdékaan ritatkala dané prasida ngelariyang kapal kayu Jepang. Dané kaburu olih Ken Pei Tai (Polisi Militér Jepang), nanging nénten prasida katangkep. Dané ngelisang pasukan ngantos setingkat batalyon sané kakepah dados para truna sané nyarengin eks Peta/Heiho/Kaigun. Pasukan irika kapersiapang antuk ngarebut malih kakuasaan politik lan militér kota Solo lan Yogyakarta. Slamet Riyadi lantas kaangkat dados Komandan Batalyon Resimen I Divisi X. Saking punika, dané akéh nyarengin utsaha ngarebut kamerdékaan.

Rikala Agrési Belanda II, Slamet Riyadi polih kapercayaan anggén mimpin Batalyon XIV. Sasampuné punika, pangkat danéné kaadegang dados Letnan Kolonel, anggén jabatan sané anyar Komandan "Wehrkeise" (Panembahan Senopati) ring sorné Komando Kolonel Gatot Subroto. Ring yudha kamerdékaan jilid kalih punika, Letkol Slamet Riyadi prasida ngabuktiang kawagedannyané. Dané ngametuang kaputusan indik "Serangan Umum Surakarta" sané kakawitin pinanggal 7 Agustus 1949 lan kalangsungang selami 4 rahina. Ring pertempuran punika, 6 orang militér Indonésiané padem. Nanging, pasukan Slamet Riyadine saget ngamademang 7 orang lan ngurung 3 orang tentara Belanda.

Ring pinanggal 10 Juli 1950, Letkol Slamet Riyadi katugasang antuk ngaleburang pemberontakan Kapten Abdul Aziz ring Makassar lan Républik Maluku Selatan (RMS) sané kapeloporin olih Dr. Soumokil. Pinanggal 4 Novémber 1950, wénten pertempuran ring lawang bénteng Victoria, Ambon. Pasukan Slamet Riyadi ngalawan akéhnyané pasukan sané mengkeb ring balik bénteng punika. Krana pasukan ring balik bénteng ngibarang bendéra Mérah Putih, Slamet Riyadi ngametuang kaputusan pangda pasukané ngawusanang penyerangan. Pasukan punika wantah tentara Siliwangi. Rikala Slamet Riyadi medal saking panser, sniper prasida nembak dané. Gerombolan punika nénten tentara Siliwangi nanging para pemberontak RMS. Letkol Slamet Riyadi lantas padem sadurung mayusa 24 tiban.[1]

Pustaka[uah | uah wit]

  1. Ensiklopedia Pahlawan Nasional. Kuncoro Hadi & Sustianingsih. Istana Media, Yogyakarta, 2015.