Panganggé Payas Agung
Panganggé utawi busana payas agung pinaka silih tunggil busana adat Bali sané kanggén rikala wénten upacara agama, minakadi sajeroning upacara menék kelih, mapandes, saha rikala margiang pula-pali pinaka grhasta asrama.[1] Soang-soang wewidangan kabupatén/kota ring Bali maderbé pakem payas agung sané matiosan, upami wénten payas agung pakem Badung, Karangasem, Klungkung, Buléléng, miwah sané tiosan. Nguni payasan agung puniki wantah kanggén olih krama kerajaan rikala ngrauhin makudang parikrama adat sané kamargiang ring Bali. Sakéwanten, ring aab jagaté mangkin, busana payas agung puniki prasida kanggén majeng makasami linggih kramané, tegesipun nénten ngabinayang linggih parajanané ring Bali.
Pakem Payas Agung Istri[uah | uah wit]
Payas agung sané istri duurné marupa angkin prada kategepin antuk ambed sané kakilitan ka pala. Kamben sané istri biasané nganggén kamben songkét khas Bali sané luih ngulangunin. Kamben songkét punika mangdané ngilidin matan batis. Ring kanta sané istri madaging badong emas. Payasan rambut sané istri kangkenin masanggul Bali kawewehin antuk gelungan emas. Wangun pepayasan agung ring prarai sank istri etahnyané nganggén srinata ring lelata sané pinaka lambang kedewasaan, ring tengahing lelata ketah madaging gecek barak sané pinaka cihna karahajengan miwah karahayuan, saha ring rambutnyané madaging saluir sekar.
Payas agung nganggén sekar cempaka miwah sandat pinaka lambang Tri Murti. Sekar cempaka kuning manados lambang Déwa Brahma, sekar cempaka petak nyinahang Déwa Siwa, miwah sekar sandat sané nyinahang Déwa Wisnu. Sekar-sekar sané nyinahang simbol Tri Mukti punika kagenahang ring prabu pinaka linggih Ida Sang Hyang Widhi Wasa sané pinih luhur manut kapercayan Agama Hindu. Payas Agung istri taler kategepin antuk gelang kana miwah papayasan tiosan sané wit saking emas. [2]
Pakem Payas Agung Lanang[uah | uah wit]
Payas agung sané lanang nganggén kamben, kampuh, miwah umpal, miwah kancut prada emas, saha payasan ring prabu marupa déstar sané wit saking kain khas Bali kawewehin antuk bunga pucuk bang asiki. Payasan prarai sané lanang pateh sareng istri, sakéwanten nénten madaging srinata. Payas agung sané lanang taler kategepin antuk keris sané madaging soca sané ngwewehin kaluihan payasan agung.
Pustaka[uah | uah wit]
- ↑ Prinada, Yuda. "Makna Baju Adat Bali "Payas Agung", Filosofi, dan Keunikannya". tirto.id (ring Indonesia). Kaaksés 2023-02-18.
- ↑ Media, Kompas Cyber (2021-05-04). "Payas Agung, Pakaian Adat Bali Halaman all". KOMPAS.com (ring Indonesia). Kaaksés 2023-02-18.