Tri Murti

Saking Wikipédia
Loncat ke navigasi Loncat ke pencarian

Tri Murti inggih punika tiga kasaktian miwah kawisésan Brahman (Sang Hyang Widhi) ring pariindikan Utpathi (makarya), Sthiti (ngupapira), Pralina (nglebur) jagat miwah sakancan dagingnyané sané maurip tur nénten maurip. Sang Hyang Widhi (Sang Hyang Tunggal) inggih punika pasanggahan (peséngan) Tuhan ring konsep Agama Hindu pamekasnyané manut krama Hindu ring Bali. Manut ring konsép Hinduisme puniki, Sang Hyang Widhi mapaiketan ring konsép Brahman. Tri Murti kawangun antuk tetiga kawisésan Brahman minakadi Déwa Brahma maduwé kawisésan Utpathi, Déwa Wisnu maduwé kawisésan Sthiti, Déwa Siwa maduwé kawisésan Pralina. Déwa Brahma maduwé sakti Déwi Saraswati, masanjata Gada, aksaranyané 'A'. Déwa Wisnu maduwé sakti Déwi Laksmi utawi Déwi Sri, masanjata Cakra Sudarsana, aksaranyané 'U'. Déwa Siwa maduwé sakti Déwi Durga/Uma/Parwati, masanjata Trisula, aksaranyané 'M'. Yéning tetiga aksara punika kagabungang, maka tetiga aksara punika dados 'AUM' sané kawacén 'OM' () sané pinaka simbol suci Agama Hindu.[1] Krama Bali precaya ring Tri Murti sané pinaka unteng sraddha (keyakinan). Yéning maosang indik Tri Murti pastika mapaiketan ring ajahan spiritual Agama Hindu sawiréh Déwa Tri Murti punika pinaka unteng déwa-déwa ring jajaran déwa sané kapercayain ring Bali.[2]

Daftar Pustaka[uah | uah wit]

  1. http://www.mantrahindu.com/trimurti-om-ॐ-tiga-kekuatan-sang-hyang-widhi/
  2. https://gamabali.com/makna-simbolik-trimurti-dalam-kehidupan/