Déwa Brahma

Déwa Brahma

Brahma utawi Déwa Brahma inggih punika silih tunggil déwa-déwa sané rumasuk ring tetiga déwa sané mautama sané kabaos Tri Murti manut ring konsép Agama Hindu ring Bali. Manut ring sastra Agama Hindu, Brahma pinaka déwa sané ngripta (Uthpati). Manut ring filsafat Adwaita, Ida kabaos pinaka silih tunggil manifestasi saking Brahman sané mabiséka déwa pangripta jagat miwah dagingnyané. Ida sering kasengguh ring sakancan kitab-kitab Hindu minakadi Upanisad tur Bhagawadgita. Kruna Brahma puniki madué artos : tumbuh, nglimbak, sayan ngageng-ngagengan nglintangin prarain Ida. Manut ring sastra lianan, parab Brahma kaartosang sakadi api (agni). Manut ring mitologi Hindu, Déwa Brahmana kapindayang sekadi anak sané sampun odah madué marerawé putih, madué prabu papat, tur papat tangan. Nénten sekadi déwa-déwi sané lianan, Déwa Brahma nénten makta sanjata ring tangan Ida. Maka papat tangan ida soang-soang ngambel Wéda, Kamandalu, Aksamala, tur bunga padma. Ida kapindayang malinggih ring bunga padma barak. Nanging ring sakancan seni, Déwa Brahma kapindayang malinggih ring wahananyané sané marupa angsa putih.

Sakadi mitologi-mitologi sané lianan, déwa-déwi ring mitologi Hindu madué kulawarga, punika taler Déwa Brahma. Manut ring mitologi Hindu, Déwa Brahma madué rabi utawi sakti maparab Saraswati. Lianan ring punika, Déwa Brahma taler madué rabi lianan maparab Gayatri sané ketah kapanggil Savitri utawi Vedamata. Manut ring sastra India Kuno, Déwa Brahma madué oka papat diri sané ketah kauningin Catur Kumara utawi Catursana. Maka papat okan Ida minakadi, Sanaka, Sanatana, Sanandana, Sanatkumara. Raris Déwa Brahma malih madué oka sané akehnyané dasa diri, sané kabaos Para Prajapati. Maka dasa putran Ida minakadi Marichi, Prachethasa, Pulatsya, Angiras, Vasistha, Pulaha, Bhrigu, Kratu, Narada Muni, tur Atri. Putran-putran Ida punika nenten medal saking anggan Déwa Brahma, nanging medal saking manah Ida. Punika mawinan, Para Prajapati kabaos Manas Putra sané maartos okan Ida Brahma sané metu saking manah Ida. Manut ring mitologi Hindu, Déwa Brahma taler madué oka istri sané madué kasaktian masalin rupa. Okan Ida punika maparab Satarupa. Ida kaloktah dados anak istri sané pertama sané karipta olih Déwa Brahma.