I Madé Sanggra
| I Madé Sanggra | |
|---|---|
| Embas | 1 Méi 1926 Kecamatan Sukawati, Kabupatén Gianyar, Bali |
| Séda | 20 Juni 2007 Kecamatan Sukawati, Kabupatén Gianyar, Bali |
| Mabangsa | Indonésia |
| Kauningin | pangawi sastra Bali |
| Oka | Putu Suarthama |
I Madé Sanggra (embas ring Sukawati, Gianyar, 1 Méi 1926 – seda ring Gianyar, 20 Juni 2007 ring yusa 81) inggih punika silih tunggil pangawi sastra Bali sané madué komitmen ngalestariang sastra Bali modéren. Dané embas ring Sukawati, Gianyar warsa 1926. Dané ngawitin ngripta sastra Bali modéren warsa 1970 antuk nyarengin sayembara taler dados juara ring sayembara punika antuk satua cutetnyané sané mamurda "Katemu ring Tampak Siring". Satua cutet punika taler kadadosang lakon arja olih Prof. Dr. I Wayan Dibia daweg Pésta Kesenian Bali (PKB) 2005. Pupulan puisi Kidung Républik (1997), ngamolihang paica Sastra Rancagé ring warsa 1998. Pupulan puisi puniki pinaka dados sastra Bali modéren sané kapertama ngamolihang Penghargaan Sastra Rancage.
Sareng pangawi sastra Bali modéren Nyoman Manda saking Gianyar, Madé Sanggra kantos lingsir kantun nerbitang majalah sastra Canang Sari. Dané ngalahin (séda) rahina Buda, 20 Juni 2007.[1]
Ring pinanggal 20 Juni 2019, Kepala Dinas Kebudayaan Bali, Dr. I Wayan 'Kun' Adnyana ngaresmiang Yayasan Wahana Dharma Sastra Madé Sanggra ring banjar Gelulung, désa Sukawati, Gianyar.[2]
Kakawian-kakawian dané sané sampun kawedar inggih punika:
- Ganda Sari (Pupulan Puisi, 1973 sareng Nyoman Manda)
- Kidung Républik (Pupulan Puisi, 1997)
- Katemu ring Tampak Siring (Pupulan Satua Cutet, 1970, 2004)
- Suara saking Setra, ngamolihan jayanti ring lomba karya puisi Listibya Bali warsa 1972[2]
- ↑ "I Madé Sanggra". suarasakingbali.com. 2016. Kaaksés 4 Pébruari 2020.
- ↑ 2,0 2,1 Bali, Nusa. "Kadisbud Bali Resmikan Yayasan Madé Sanggra". www.nusabali.com (ring Inggris). Kaaksés 2020-10-04.
