I Papaka
| I Papaka | |
|---|---|
 Lukisan Bali saking Koleksi Van der Tuuk, 1986 | |
| Satua | |
| Aran | I Papaka |
| Taler mamurda | Katuturan I Papaka |
| Data | |
| Mitologi | Tantri |
| Negara | Indonésia |
| Wewidangan | Bali |
Kaucap wénten carita I Papaka, uli cenik iya tusing taén mambek rahayu. Kacritayang jani ia luas maboros ka alasé, sakéwale sepi pesan tusing ada buron tepukine, ada lantas gajah, ento tiwakine panah kadi ujan ulungan panahe, jemparingnyané, tambis-tambis ngenénin I Gajah, I Gajah malaib. Suba tandang lempeh pelaibnyané I Gajah, dadi kacunduk tekén I Macan. Matakon I Macan, "Apa awanan cai Gajah teka masebeng kecut ?". Masaut I Gajah," Kéné ko Macan, déwéké kaboros baan manusa, dasdasan bakatanga, baan prandyanné niwakang panah sekadi jemparing". Mara kéto, brangti I Macan tekén I Gajah "Ih, Gajah, bas kaliwat nista iba, tekén manusa corah. Nirguna kagedénang ibané, kadi gunung laku. Sing pesan cai ngenehin katajepan batis cainé, yan upamayang batis cainé saksat I taru agung. Nah jani déwéké apang tangkepiné".
Ditu lantas I Macan saha nyagjag I Papaka. I Macan acereng nelik saha nyagjagin I Papaka, nyananné lakar nyarap. Katuju I Papaka katonanga I Macan tambis nagih nyarap déwékné tengkejut, laut ia malaib. Kaetut uri baan I Macan, kabinawa suarannya ngelur "Ih, jani mati iba manusa corah, kai ngamah iba". I Papaka kadéwa ratu, reh das bakatanga baan I Macan. Dadiannya I Bojog madan I Wenari, kapiwelasan nulungin I Papaka. Kéné munyin I Bojog, "Duh, déwa meriki tiang alih menék, gelisang menék ka taruné. Yening kasepan tan pariwangdé I Déwa pademange". Raris kadandan antuk I Wenari menék ka taru Bunuté. I Papaka ngejer baan jejehné, saha ngasih-asih, "Duh, déwa Wenari, urip jua tiang wong kawelas asih". Kenyem Ni Wenari saha mamunyi, "Inggih déwa, sampunang i déwa ajerih, sing ja tiang ngulungan kapi i déwa, buina nentén je ampang-ampang buat pitresnan tiangé ring i déwa. Sampunang i déwa sumangsaya". Mara kéto pamunyin Ni Wenariné, I Macan mamunyi nyerit, "Ih, Nyai Wenari, sing je sedeng nyai masawitra tekén manusa corah, satata mamati-mati sato, bine idepnyané tekén sang sadu". Samaur kéné Wenari, "Kénkén jelén sesana manusané, corah ucapang cai, ia tetep enu dadi manusa melah yéning baanggin sasuluh lan pertiwimba, sinah yéning cai Macan nyarap manusané ené sinah bas kalintang agung dosan cainé". Mara akéto pamunyiné Ni Wenari lantas I Macan maklieng sinambi mamunyi "Nah yan akéto munyin nyainé, buin pidan ja ade manusa mamati-mati baburon di alasé mula kawenang kai lakar nyarap".
Kéto anaké ané demen mamati-mati sinah sengkalané lakar kapanggih.