IDK Raka Kusuma

IDK Raka Kusuma
Embas	21 November 1957 Getakan, Klungkung, Bali
Séda	5 Agustus 2023 Klungkung, Bali
Mabangsa	Indonésia
Kauningin	pangawi sastra Bali

I Déwa Nyoman Raka Kusuma utawi kaancengin IDK Raka Kusuma (embas ring Klungkung, Bali, 21 Nopémber 1957 – seda ring Klungkung, Bali, 5 Agustus 2023 ring yusa 65) inggih punika guru Basa Bali ring Sekolah Dasar Saraswati, Amlapura. Dané sampun kasub kauningin dados pangawi sané sayukti nyalanang éksplorasi ring tradisi Bali. Raka Kusuma sampun aktif makarya sesuratan ngawit saking dané dados guru Sekolah Dasar ring désa Kamasan, Klungkung.

Dané nyurat makudang-kudang puisi mabasa Bali, satua bawak, esai basa Bali, miwah novélét mabasa Bali. Lianan ring punika, dané taler nyurat puisi, cerpén, lan ésai mabasa Indonésia. Saking dewasané punika sesuratan dané sampun kawedarang ring média daérah miwah nasional sakadi Bali Orti (Bali Post), Médiaswari (Pos Bali), Bali Aga, Jurnal Kawi, miwah Canang Sari miwah sane lianan. Tur kakawian dané sané mabasa Indonésia kawedar ring Bali Post, Nusa Tenggara, Karya Bakti, Warta Bali, Nafiri, Warta Hindu Dharma, Minggu Pagi, Kedaulatan Rakyat, Mimbar Indonésia, Suara Nusa, Pikiran Rakyat, Suara Karya, Sinar Harapan, Berita Buana, Républika, Singgalang, Analisa, Cak, Kolong, Romansa, basabasi.co, tatkala.co, miwah sane lianan. Tiosan nyurat puisi, dané taler kauningin dados pangwacén sané waged. Ring warsa 1987, dané kaundang olih Déwan Kesenian Jakarta antuk ngwacén sesuratan idané ring Forum Puisi Indonésia 1987 ring Taman Ismail Marzuki, Jakarta.

Ring warsa 2002, dané ngmolihang Penghargaan Sastra Rancage antuk jasa-jasane ngembangin sastra Bali Modéren.

Kasusastraan

Sesuratan idané inggih punika:

• Sunaran Bulan Tengah Lemeng, Kidung I Lontar Rograg (1991)
• I Balar (2006)
• Ngamar Bulan (2006)
• Enjung Kalyana (2014)