Tuak

Saking Wikipédia
Loncat ke navigasi Loncat ke pencarian
Bottles and a glass of palm wine
Tuak mawadah botol lan gelas

Tuak wantah silih sinunggil minuman tradisional sané wénten ring Bali, tuaké punika kakaryanin saking nyuh, jaka, miwah ental. Ring Bali, wewidangan sané ngasilang tuak minakadi Karangasem, Buléléng, miwah Klungkung. Wewidangan punika wantah wewidangan sané nganggén tuak pinaka bahan kaanggén makarya gula Bali. Proses ngambil tuak kawastanin ngirisin. Tuak kakaryanin antuk ngeeb utawi ngeteb troktokan sané kabersihin dumun ring wadah sané kawastanin bungbung. Proses nuakin punika sané kawastanin ngirisin. Tuak punika kabanggeang ngetél sakabedik ring bungbungé.[1]

Anaké ngirisin majalan ngedas lemah utawi semengan mangda ngamolihang tuak akéh. Risampuné punika tuak kabanggéang ngetél ngantos sanja. Risampunné sanja tuak kaambil saking punyanné. Tuak sané wawu tuun punika kalablab mangda ten masem. Wénten kakalih tuak sané kaasilang inggih punika tuak manis miwah tuak masem. Tuak manis prasida kainum dados minuman taler prasida kanggén bahan makarya gula Bali. Anaké di Klungkung maosang nyuh gadang silih tunggil nyuh sané madué kualitas tuak pinih becik. Yéning tuak punika kagenahang tan kakujang-kujang pastika tuak punika dados tuak masem. Tuak masem punika kaolah kadadosang arak.

Ring Bali wewidangan sané ngasilang tuak sané kaloktah pisan inggih punika Karangasem. Tuak saking punyan jaka, ental miwah nyuh wénten irika. Rikala upacara agama talér wénten sané nganggén tetabuhan marupa tuak miwah arak.

Pustaka[uah | uah wit]