Prasasti Bebetin

Prasasti Bebetin
Prasasti Bebetin
Aksara	Aksara Bali Kuna
Basa	basa Bali
Dibuat	896
Genah	Bebetin, Kecamatan Sawan, Kabupatén Buléléng, Bali
Identifikasi	Bebetin AI

Prasasti Bebetin (utawi Bebetin AI) marangka 818 çaka (896 M), silih tunggil prasasti katemuin ring désa Bebetin, Kecamatan Sawan, Kabupatén Buléléng, Bali. Prasasti punika nganggén basa Bali Kuna. Prasasti madaging indik satunggil désa (banwa) bharu, utawi jangkep nyané kuta ring banwa bharu, sané martos désa bharu sané mabenténg. Prasasti Bebetin AI puniki nénten nganikayang parab raja sané ngawedar prasasti, menawi nganikayang wastan puri, sané kawastanin panglapukan ring Singamandawa.

Daging

Ring prasasti kaceritayang indik désa punika kajurit miwah karusak olih perampok. Akéh krama nyané padem utawi matatu, taler akéh sané ngungsi ring désa panyanding ipun. Sesampun aman, krama irika selanturné mawalik nuju désa bharu. Salanturnyané raja nikain pajabat ipun nayakan pradhana, punika kumpi ugra miwah biksu Widya Ruwana antuk ngamimpin pawangunan Pura Hyang Api, matatujon ngajangkepin désa punika ring widang niskala, ring wates wewidangan sané sampun kanikayang. Désa bharu kacawang magenah ring pasisi kalér Nusa Bali, punika silih tunggil labuhan sané wénten ring galah punika. Cawangan puniki mawit saking prasasti sané nikayang parikrama para banyaga saking dura Bali sané maadolan irika, taler kanikayang napi sané patut kamargiang pinaka jukung-jukung nyané rusak.

Prasasti prasasti puniki taler nganikayang parikrama-parikrama pawagian arta warisan miwah panetapan indik swadharma miwah ayah-ayah taler paican krama sané nyeneng irika.

Tiosan kanikayang indik piranti gamelan, punika ring lempir 2 b, no 5, sané kasurat pamukul, pagending, pabunying, papadaha, parbhangsi, partapukan miwah parbwayang.^[1]^[2]^[3]

Sasuratan

Atenga suratan prasasti Bebetin AI, asapunika kawacen ring lempir Iib.3-4 kasuratang sakadi puniki:

… anada tua banyaga turun ditu, paniken (wacén: paneken) di hyangapi, parunggahna, ana mati ya tua banyaga, perduan drbyana prakara, ana cakcak lancangna kajadyan papagerrangen kuta … (Goris, 1954a: 55).

Paartosan

…Pinaka banyaga malabuh irika, paneken kaaturin ring genah Hyang Api, (pinaka) wénten padem (riantara) banyaga punika, samian arta brana nyané kawagi kalih, (pinaka) jukung nyané rusak, mangda kadadosang pagehan antuk nguatang kuta, …

Cingak taler

Pustaka

↑ Roleof Goris, Prasasti Bali jilid I, (Bandung: 1954), hal. 13
↑ R. Soetrisno, Sejarah Karawitan. (Surakarta: Akademi Seni Karawitan Indonésia. 1976), hal. 22.
↑ I W M Aryasa, Perkembangan Seni Karawitan Bali, (Denpasar: Proyek Sarana Budaya Bali, 1976/1977), hal 13.

Pranala jaba

Alur Pakembangan Kabudayaan Bali IV olih Hendra Santosa

[1] Roleof Goris, Prasasti Bali jilid I, (Bandung: 1954), hal. 13

[2] R. Soetrisno, Sejarah Karawitan. (Surakarta: Akademi Seni Karawitan Indonésia. 1976), hal. 22.

[3] I W M Aryasa, Perkembangan Seni Karawitan Bali, (Denpasar: Proyek Sarana Budaya Bali, 1976/1977), hal 13.

[1]

[2]

[3]