Kebun Raya Bali
| Kebun Raya "Eka Karya" Bali | |
|---|---|
| Kebun Raya Bedugul | |
 Kebun Raya Bali - saking duur | |
 | |
| Genah | Kabupatén Tabanan, Bali |
| Koordinat | 8°16′40″S 115°09′16″E / 8.2778°S 115.1544°E |
| Jimbarnyane | 157.5 héktare (15,750 a; 1.575 km2) |
| Kawangun | 15 Juli 1959 |
| Operator | Lembaga Ilmu Pengetahuan Indonésia |
| Situs web | https://www.kebunrayabali.com/ |
Kebun Raya "Eka Karya" Bali utawi Kebun Raya Bedugul inggih punika silih tunggil kebun botani sané pinih ageng ring Indonésia.[1] Magenah ring Bedugul, Désa Candikuning, Kecamatan Baturiti, Kabupatén Tabanan, Bali dohnyané 60 km saking Dénpasar. Kebun puniki dados kebun raya kapertama sané kawangun olih putra wangsa Indonésia.[2] Kaémpon olih Lembaga Ilmu Pengetahuan Indonésia (LIPI) taler manutin struktur organisasi kawéntenang ring betén Pusat Konservasi Tumbuhan Kebun Raya Bogor. Kawangun 15 Juli 1959. Ring awalnyané Kebun Raya Eka Karya Bali kaanggén pelestarian soroh runjung. Kebun sané kawéntenang ring duur 1.250–1.450 m dpl mangkin dados wewidangan konservasi ex-situ antuk tumbuhan pegunungan tropika Wewidangan Kangin Indonésia. Jimbar wewidangan Kebun Raya sadurungné 50 ha, sané mangkin jimbarnyané sampun 157,5 ha.
Kagagas olih Prof. Ir. Kusnoto Setyodiwiryo, Direktur Lembaga Pusat Penyelidikan Alam sané mejangkep dados Prajuru Kebun Raya Indonésia, miwah I Madé Taman, Prajuru Lembaga Pelestarian dan Pengawétan Alam punika medué manah ngewangun Kebun Raya ring dura Jawa, ring indik punika Bali. Nampekin antuk Pemda Bali ring warsa 1955, ngelantur ring warsa 1958 Lembaga Pusat Penyelidikan Alam ketawarin antuk ngewangun Kebun Raya ring Bali olih prajuru sané medué genah ring Pamréntahan Bali karesmiang.[3]
Kasepakatang genah Kebun Raya jimbarnyané 50 ha sané ngejangkep wewidangan wana reboisasi Candikuning, sané kewatesin langsung Cagar Alam Batukau. Ring pinanggal 15 Juli 1959, Kebun Raya “Eka Karya” Bali karesmiang olih Prof. Ir. Kusnoto Setyodiwiryo, Direktur Lembaga Pusat Penyélidikan Alam sané dados réalisasi SK Kepala Daérah Tingkat I Bali pinanggal 19 Januari 1959 No. 19/E.3/2/4.[3]
Wastan Eka Karya antuk Kebun Raya Bali kausulang olih I Madé Taman. Eka Karya sané mearti dados Kebun Raya sané kapertama kewangun olih wangsa Indonésia selantur kamerdékaan Indonésia. Kebun raya punika kakususang antuk ngoléksi Gymnospermae (taru medon jaum) saking sejebag guminé mawinan soroh-soroh punika idup becik ring kebun raya. Koleksi kapertama akeh kerauhang saking Kebun Raya Bogor miwah Kebun Raya Cibodas.[3]
Ring kaprajuruan I Gedé Ranten, B.Sc. (1975 – 1977), jimbar wewidangan kebun raya katambahin nganti 129,2 ha. Ring kaprajuruan Ir. Mustaid Siregar, M.Si (2001 – 2008) jimbar wewidangan kebun raya katambahin nganti 157,5 ha. Piteket awal kadiriang antuk konservasi taru medon jaum (Gymnospermaé), sané mangking Kebun Raya sané megenah ring 1.250 – 1.450 m dpl, mesuhu kirang langkung 18 - 20 °C taler ayubnyané 70 – 90% niki ngelantur dados wewidangan konservasi ex-situ taru pegunungan tropika wewidangan kangin Indonésia. Statusnyané sané mangkin Unit Pelaksana Teknis Balai Konservasi Tumbuhan Kebun Raya “Eka Karya” Bali.[3]
Koléksi anggrek katata ring wewidangan taman sané karintis ring prajuru Drs. Sukendar (1979 - 1980). Jimbarnyané genah sané mangkin sampun 0,5 ha, kewagi antuk kalih wewidangan. Taman Anggrek ring betén punika wewidangan kebuka dados genah koléksi anggrek silangan, sané kekalih Taman Anggrek ring duur punika genah antuk anggrek linyaran. Koleksi anggrek punika keasal saking mekudang-mekudang wewidangan ring Indonésia, inggih punika Bali, Nusa Tenggara, Sulawesi, Kalimantan miwah Papua. Luwih saking 293 jenis anggrek sané dados koléksi Kebun Raya Bali.[4]
Ring Indonésia kawéntenang 213 jenis. Begonia Indonésia biasanyané Begonia daun utawi Begonia rex sané meduwé don mewarna becik contoné perak, ijo, bang, utawi corak warna sané kacampur. Begonia hibrid akeh wénten ring Taman Begonia Kebun Raya Bali. Begonia hibrid sané measal saking silangan Begonia alam (Begonia spésiés). Kebun Raya Bali sampun mekarya asiki jenis hybrid anyar sané mewasta Begonia "Tuti Siregar". Kadasaring antuk data koleksi Kebun Raya Bali Per Méi 2015 sané kecatet, kawéntenang 920 spésimén saking 94 jenis koléksi Begonia sané katata ring Taman Begonia.[4]
Ring Kebun Raya Bali kawéntenang 68 jenis kaktus sané katata ring dalem umah kaca jimbarnyané 500 m² mangde nentén kéni ayub. Liané saking Bali, koléksi kaktus sané kawenténang ring Umah Kaca Kaktus niki taler saking Meksiko, Jerman, Selandia Anyar miwah Argentina.[4]
Koléksi taru paku katata ring dalem wewidangan jimbar nyané 2 ha sané kawastanin Taman Cyathea. Wastan ipun saking wasta Marga taru paku. Kawéntenang 80 jenis taru paku sané dados koleksi keasal saking Bali, Nusa Tenggara, Sulawesi, Sumatera miwah Papua. Taru Paku Cyathea contaminans miwah Cyathea latebrosa sané mentik alami taler paku kidang Dicksonia blumei sané keasal Bukit Pohen, Bali.[4]
Taman Panca Yadnya inggih silih tunggil genah koléksi entik-entikan sané kaanggén upakara, kakoléksi saking warsa 1991 miwah magenah ring nampek Pura Batumeringgit. Koléksi punika kadiri antuk 580 entik - entikan saking 42 suku, 81 marga taler 130 jenis, sakadi dapdap, base, biu, bingin, miwah sané liané.[4]
- Kapustakaan
- Hérbarium
- Laboratorium
- Pemanduan
- Akomodasi
- Genah Pesangkepan
- Toko Supenir
- Genah Nginep
Pabéa ngeranjing Kebun Raya Bali:[5]
- Tikét Ngeranjing Tamiu Dura Négara: Rp. 17.000,-
- Tikét Ngeranjing Tamiu Doméstik: Rp. 9.000,-
- Tikét Roda 4 Ngiterin Kebun: Rp. 11.000,-
- Tikét Parkir Roda 2 (Montor, Sepéda, msl): Rp. 3.000,-
- Tikét Parkir Roda 4: Rp. 6.000,-
- Tikét Parkir Roda 6 (Bus, Truk, msl): Rp. 11.000,-
- Tikét Ngeranjing Tamiu sampun rumasuk Asuransi Jasa Raharja Distribusi Pemkot
- ↑ "Jelajah Kebun Raya Bali, Kebun Botani Terbesar di Indonésia". travelingyuk.com (ring Indonesia). Kaarsipin saking versi asli tanggal 14 July 2022. Kaaksés 26 February 2019.
- ↑ "Kebun Raya Eka Karya Bali Sedot 700.000 Pengunjung Setiap Tahun". bali.bisnis.com (ring Indonesia). Kaaksés 14 January 2020.
- ↑ 3,0 3,1 3,2 3,3 "Sejarah Kebun Raya Bali". kebunrayabali.com. Kaarsipin saking versi asli tanggal 2020-01-27.
- ↑ 4,0 4,1 4,2 4,3 4,4 "Koleksi Kebun Raya Bali". kebunrayabali.com. Kaarsipin saking versi asli tanggal 2020-01-21.
- ↑ Peraturan Pemerintah (PP) No. 32 Tahun 2016, kaaksés 16 January 2020