Dwijendra Tattwa

Dwijendra Tattwa
Wikipustaka
Aran liyanan	dwijendra​tattwa
Pinanggal asal	masa Dalem Waturenggong
Kawedar kapertama ring	Bali
Basa(-basa)	Basa Kawi miwah Basa Bali
Pangawi	Ida Pedanda Ler
Kadedikasi tekén	Dang Hyang Nirartha
Ukuran	cm x cm
Format	Susastra
Aksara	Aksara Bali
Ngranjing Koleksi ring	Kapustakaan Kantor Dokuméntasi Budaya Bali
Klasifikasi Gedong Kirtya	Itihasa

Dwijendra Tattwa inggih punika lontar sané nyritayang indik palampah Dang Hyang Nirartha ngawit saking Pasuruan, Jawa Kangin nyantos pasamaptan ida ring Uluwatu, Bali. Lontar puniki karipta olih silih tunggil warih ida, minab Ida Pedanda Ler duaning sira sujatiné sané ngripta nenten munggah ring lontar puniki. Lontar puniki nganggén basa Kawi utawi Jawi purwa ring lempiran-lempiran kapertama. Sakewanten ngawit ring lempiran 39a-40a, basa sané kaanggén saget magentos dados basa Bali alus singgih. Madasar antuk napi sané kapanggih puniki, prasida kacutetang rauh amunika indiké lontar Dwijendra Tattwa nenten karipta olih asiki pangawi, sakewanten akudang pangawi ring masa-masa sané maliyanan. Lempiran kapertama minab karipta duk masa Dalem Waturenggong, utawi nenten suwe saampun Dang Hyang Nirartha lebar duaning daweg nika budaya kapangawian ring Bali sedek nedeng ring masan jayané. Sakewanten lempiran-lempiran salanturnyané minaban karipta olih warih Ida Dang Hyang Nirartha akudang satawarsa sasampuné.

Lontar Dwijendra Tattwa rumasuk pikaryan sastra religius miwah biografi Dang Hyang Nirartha utawi Bhatara Sakti Wawu Rauh sakadi akehan anaké uning. Ring sajeroning lontar-lontar biografi sané kantun mangkin, Dwijendra Tattwa dados lontar biografi sané karipta ring masa pinih nampek saking masan nyeneng ida sang sané kacaritayang.