Cebur nuju daging

Dalung, Kuta Utara, Badung

Saking Wikipédia

Koordinat: 8°36′39″S 115°10′22″E / 8.610877°S 115.172717°E / -8.610877; 115.172717

Dalung
Peta
Peta genah Désa Dalung
Negara Indonésia
PropinsiBali
KabupaténBadung
KecamatanKuta Utara
Kodepos
80361
Kode Kéméndagri51.03.06.2006 Uah nilai ring Wikidata
Kode BPS51.03.06.2006
Jimbar6,15 km²[1]
Akéh krama19.317 diri (2016)[1]
30.228 diri (2010)[2]
Kepadetan4.915 diri/km² (2010)
Akéh RW23 Banjar[1]
Akéh KK4.911[1]
Situs webdalung.si-desa.com

Dalung inggih punika silih tunggil désa dinas sané magenah ring Kecamatan Kuta Utara ring wewengkon Kabupatèn Badung, Bali.[3] Jimbar wawidangan désa Dalung 675,71 héktar. Désa puniki kakepah dados selaé dusun utawi banjar dinas, tigang désa pakraman, miwah pitulas banjar adat.

Lelintihan[uah | uah wit]

Pamahbah kaadegang nyané Désa Dalung dahat kakait sareng kawéntenan Désa Pakraman Padangluah sané dados pahan saking karatuan Meliling. Karatuan puniki ring pangawitné kamanggalain olih I Gusti Gedé Meliling, inggih punika putra kapat saking Raja III Mengwi punika I Gusti Agung Nyoman Alangkajeng. Ring masa I Gusti Gedé Meliling, indik Pamréntahan kapusatang ring Padangluah, paindikan karatuan sanget tegteg becik ring ékonomi utawi sosial politik. Tan kasengguh ring catetan lelintihan indik pamiwalan ring aab punika. Indik katentreman karatuan magentos ri tatkala Ida séda. Putra-putra Meliling saling marancana taler karasa tan adung miwah tan masikian. Paindikan punika tan lémpas wénten pasarengan saking karatuan liyanan sané madué kabuatan indik wawidangan sané kaloktah genah ipun becik miwah lanus.[4]

Akéh wénten miwal tiosan wénten ngetuh hawanan uwug nyané aungan toya saking Dam Gumasih nénten ngarajing nuju wawidangan Padangluah miwah nampek nyané. Para krama gerit miwah durbiksa. Pikobet liyanan tan kakelidang. Pucak nyané ri tatkala aab I Gusti Gedé Tibung cucu sakinh I Gusti Gedé Meliling, dados Yuwe Raja ring Padangluah. Rikala nika wénten upacara ngabén I Gusti Gedé Tegeh I putra I Gusti Gedé Meliling miwa ajik saking I Gusti Gedé Tibung. Yuda semeton punika tan sida kakelidin. Semeton tugelan tios I Gusti Gedé Tegeh, punika I Gusti Gedé Mangku saking Tibubeneng ngagempur Padangluah, sané ngawinan séda nyané I Gusti Gedé Tibung ring Kwanji.[4]

Séda nyané I Gusti Gedé Tibung ninggalin papat putra. Makapapat putra punika lunga nuju Dauh Tukad Yéh Poh (sisi kawan Tukad Yéh Poh, mangkin: Banjar Kaja) sareng kulawarga soang-soang. Makapapat putra punika I Gusti Gedé Tegeh (III), I Gusti Nengah Tegeh, I Gusti Gedé Dauh, miwah I Gusti Ketut Dauh. Saking genah puniki, dané meték sisa-sisa kaluwarga miwah krama sané kantun. Dané ten doh saking Padangluah, mangda prasida nyingakin pakembangan Padangluah miwah nyelametang krama sané kantun ring Padangluah taler perlu wantuan. Kanikayang genah pinih necik wénten ring Dauh Tukad Yéh Poh punika (mangkin Banjar Kaja, Dalung). Aspunika kaputusang antuk nyeneng sauntara irika sambil ngawangun rencana lantur. Rasa duka kaicalan krama, semeton, rerama, sawitra, miwah wawidangan. Makapapat putra I Gusti Gedé Tibung mautsaha antuk ngateguhang raga miwah ngateguhang sradha punika mangda nénten ical semangat. Ring paindikan sekadi punika wénten paistilah "De Elung" utawi "Da Elung", kruna punika kabaosang kasebar saking cangkem majeng makasami krama, antuk ngawangun méntal miaah semangat. Asapunika mumbul paistilah Dalung sané salantur nyané dados aran Désa inggih punika Désa Dalung. Kacawang wénten riantara warsa 1823-1825.[4]

Ring genah punika salanturné dados wawidangan Banjar Kaja punika kawangun Pura Dalem Tibung sané punika “sunar” Pura Dalem Tibung Kwanji. Antuk ngicalang “ngetor” rasa jerih krana patempuran kantun leket, saking pura punika yadiastun kantun sadarana, dané sareng krama ketah nunas karahayuan. Sunar sané kapendar ring Pura Dalem Tibung, mawit sareng aab punika gejeran jengah miwah semangat antuk matangi. Krana nika, Pura Dalem Tibung kanikayang dados pura antuk nunas kajayaan, wibawa, kakuasaan, miwah pangaruh. Saking pura punika kapolihang suwéca, antuk ngawangun désa antuk sengker papat pura, sané ngiterin Désa Dalung. Kapertama patut katimbang punika pawangunan Pura Kayangan Tiga miwah Genah Pusat Pamréntahan (Jero Gedé), sané patut magenah ring jero itehan sengker papat pura. Ring proses lelintihan makudang warsa salantur nyané konsép Pusat Pamréntahan ngawit karupayang olih I Gusti Gedé Tegeh, I Gusti Gedé Dauh miwah I Gusti Ketut Dauh ngarereh genah sané langkung becik (mangkin ring Banjar Tegeh Dalung) genah punika kalotah antuk aran Jero Gedé, adi sané pamadé I Gusti Nengah Tegeh lunga miwah nyeneng ring Tegaljaya. I Gusti Ketut Dauh sané akéh madué oka, meneng ring Banjar Lebak, wénten taler sané meneng ring Cepaka.[4]

Géograpis[uah | uah wit]

Wates Wawidangan[uah | uah wit]

Wates wawidangan administratip nyané minakadi:

Kalér Kalurahan Sempidi
Kelod Kalurahan Seminyak
Kauh Désa Perérénan
Kangin Kalurahan Kerobokan

Pawiguna wawengkon[uah | uah wit]

Jimbar wawidangan désa Dalung 675,71 héktar, pawiguna ipun luiré:

  • Paumahan 256 Ha
  • Pategalan 188,2 Ha
  • Paumaan 92,25 Ha
  • Sétra 1,23 Ha
  • Pakarangan 41,06 Ha
  • Pakantoran 66,22 Ha
  • Fasilitas Umum liyanan 30,75 Ha

Pamréntahan[uah | uah wit]

Désa Dinas[uah | uah wit]

Wewidangan désa Dalung madué selaé dusun utawi banjar dinas, inggih punika:[5][6]

  1. Dusun Tuka
  2. Dusun Kung
  3. Dusun Dukuh
  4. Dusun Padang Bali
  5. Dusun Pengilian
  6. Dusun Pegending
  7. Dusun Lebak
  8. Dusun Cepaka
  9. Dusun Kaja
  10. Dusun Untal-Untal
  11. Dusun Tegeh
  12. Dusun Tegaljaya
  13. Dusun Celuk
  14. Dusun Pendem
  15. Dusun Gaji
  16. Dusun Kwanji
  17. Dusun Camas Kangin
  18. Dusun Camas Kauh
  19. Dusun Taman Tirta
  20. Dusun Tegal Luwih
  21. Dusun Bhinéka Nusa Kangin
  22. Dusun Bhinéka Nusa Kauh
  23. Dusun Bumi Mekar Sari
  24. Dusun Campaun Asri Kangin
  25. Dusun Campuan Asri Kauh

Désa Adat[uah | uah wit]

Mawit adat ring Désa Dalung kagenahain olih tigang Désa Pakraman, sané kepahan dados pitulas banjar adat, inggih punika:[5]

Désa Pakraman Tuka
  • Banjar Tuka
Désa Pakraman Dalung
  • Banjar Kung
  • Banjar Dukuh
  • Banjar Padang Bali
  • Banjar Pengilian
  • Banjar Pegending
  • Banjar Lebak
  • Banjar Cepaka
  • Banjar Kaja
  • Banjar Untal-Untal
  • Banjar Tegeh
Désa Pakraman Padangluwih
  • Banjar Tegaljaya
  • Banjar Celuk
  • Banjar Jeroan
  • Banjar Pendem
  • Banjar Gaji
  • Banjar Kwanji

Krama[uah | uah wit]

Ring warsa 2016, akeh krama désa Dalung kabagi antuk 9.976 lanang miwah 9.341 istri miwah sex rasio 92. Krama sané embas ring warsa 2016, 117 diri miwah seda 85 diri.[1]

Pustaka[uah | uah wit]

  1. 1,0 1,1 1,2 1,3 1,4 "Kecamatan Kuta Utara dalam Angka 2017" (ring Indonesia). Badan Pusat Statistik Indonésia. 2018. Kaaksés 4 Oktober 2019.
  2. "Penduduk Indonesia Menurut Desa 2010" (PDF) (ring Indonesia). Badan Pusat Statistik. 2010. p. 132. Kaaksés 14 Juni 2019.
  3. "Peraturan Menteri Dalam Negeri Nomor 137 Tahun 2017 tentang Kode dan Data Wilayah Administrasi Pemerintahan". Kementerian Dalam Negeri Républik Indonésia. Kaaksés 3 Oktober 2019.
  4. 4,0 4,1 4,2 4,3 Kusuma, I Gusti Ngurah Agung Eka Teja. Dari Padangluah ke Dalung (édisi ka-II).
  5. 5,0 5,1 Data Désa Adat Kabupatén Badung, NangunSatKertiLokaBali.com, kaarsipin saking versi asli tanggal 11 November 2020, kaaksés 9 November 2020
  6. "Profil Désa Dalung". kampungkb.bkkbn.go.id. Kaaksés 2019-04-10.

Pranala jaba[uah | uah wit]