Canang
Canang Sari (Aksara Bali: canaŋsari) inggih punika sarana sané mabuat pisan majeng ring krama umat Hindu ring Bali. Wénten makudang-kudang soroh canang inggihnyané canang bunter, canang don, canang sari, miwah canang sodan. Canang madasar antuk ceper utawi don sané matékor.
Ritatkala makarya canang, kapertama patut kadagingin antuk baas, biu matah, tebu, miwah porosan. Canang taler kadagingin antuk sekar sakadi pacah, gemitir, kembang seribu, jepun, kembang kertas, sandat, tunjung, cempaka miwah sané lianan. Ritatkala nanding canang, sekar sané mawarna putih kagenahang ring sisi kangin, sekar sané mawarna kuning kagenahang ring sisi kauh, sekar sané mawarna badeng utawi ungu kagenahang ring sisi kaja, miwah sekar sané mawarna barak kagenahang ring sisi kelod.
Sekarkembang seribu ketahnyané kagenahang ring sisi kaja utawi sisi kelod. Baduur sekaré punika kagenahang kembang rampé sané malakar aji don pandan masirsir. Jangkepnyané kasarengin antuk uras miwah lengis miik. Canang dados katumbas ring peken utawi warung-warung yéning nénten wénten galah antuk ngaryanin canangé punika.