Tari Tenun
Tari Tenun inggih punika silih tunggil tari sané wénten ring wewidangan pulo Baliné. Tari punika nyihnayang indik anak isteri sané sedek makarya kain tenun. Carita sané kaangkat ring tari punika indik anak-anak isteri saking aab sané dumunan makarya tenun sadina-dina. Tari Tenun kakaryanin olih I Nyoman Ridet miwah I Wayan Likes duk warsa 1962.[1] Tari punika kakaryanin matetujon antuk ngajegang budaya tenun sané wénten ring Bali tur ngajegang sarana sané kaanggén ri tatkala nenun. Tari Tenun kasolahang olih tigang diri utawi langkungan anak isteri. Sasolahan sané wénten ring igelan punika kakawitin olih anak isteri sané memintal benang ring alat tenun tur kapuputang antuk nenun. Panganggé sané kaanggén olih pragina Tari Tenun inggih punika :
- Ring sirah nganggén lelunakan
- Panganggé sané kaanggén inggih punika tapih, kamen, anteng sané kalilit ring wewidangan tangkah miwah sabuk prada
- Bunga semanggi sané kaanggén ring sirah pinaka penghias[2]