Sesemon

Sesemon punika taler sakadi sesimbing, sakewanten luwih alus lengut tur nudut kayun. Sesemon puniki wénten sané mawangun tembang, utawi gancaran, sakadi ring sor puniki:

Taruna: "Béh apa kadén melah bunga nagasariné ento, yan tiang maan ngubuhin bungané ento, apa kaden liang atine".
Taruni: "Apa perluné ngubuhin kayu buka kéné, ané tan paguna, tulén bena lakar tuyuh nyampatang luu sai-sai".

Conto

Wenten sesemon anggén sekar macapat (Sekar alit) luir ipun:

Pupuh Ginada

Tiang Mriki Ngrereh "Bunga"
kocap wénten "cempaka putih"
iriki genahnya reko
kocap luih warnanipun
nawang tranggana ngadika
inggih wiakti
"nanging déréng masamaya alap".

Saséndoné Kadi ring Sipta
"dumadak ya ulung jani
delima wantané ento
akatih tengahin dalu
titiang masesangi nyangga
baan kacing
titiang suka matoh diri".

Radén Galuh Weruh Sipta
kenyung raris nyaurin
"lamun paingenan reko
madia latriné ya ulung
di pekené ya tibéninnya
soring bingin

manakti apang pasaja".