Sesimbing

Sasimbing puniki kruna (ucapan) papiringan sané pedes suksmanipun, makardi sang kasimbing jengah wiadin sebet, riantuk ngrasa ring dewek katiban sasimbing punika. Sasimbing puniki sering kaucapang ring ajeng sang kasimbingin, nganggé kruna paimbangan sané sada silib artinipun, indik kalih polah jadma, barang kalih buron. Riasapuniné sasimbing puniki nganggé kruna nungkalik, umpami: belog kaucapang ririh, lekig utawi kiul kaucapang anteng. Wenten makudang-kudang sasimbing sané mawangun gancaran miwah tembang umpami: "Kadang tan tinolihin", tegesipun: Anake sané ngutamayang dewek ipune kewanten, nenten nglinguang nyama braya.

Conto

Ring sor puniki wantah conto-conto sasimbing:

1. Be di pongerangan baang ngeleb; tegesipun: Sakadi anake ngambil anak istri bajang, sampun kakeniang, ri kala ipun lenge, anak istri punika malaib.
2. Bas tegeh baan negak, dilabuhe baonge elung; tegesipun: Sakadi anake polih pangkat tegeh, raris nyeled pipis utawi korupsi, ipun katara raris kausanayang makarya tur ipun salah maukum.
3. Yadin amunapi tegeh pakeber badudané, diulungne masih ka taine; tegesipun: Yadin amunapi ageng anake polih kabagian, yéning sampun ganti surud kasadianipun, taler ipun mawali tiwas sakadi kuna.
4. Semunné nyukcuk langit; tegesipun: Kaucapang ring anake sané sombong.
5. Sadueg-dued semale makecos, pasti taen ulung; tegesipune: Asapunapi je ririh anake, pasti ipun taen iwang utawi salah.

Conto sasimbing sané mawangun tembang (Geguritan Sampik Ingtay):

1. Aduh beli to kenkenang, uh ban ento ené danda juang beli, sang ja nganggeh nyang adauh, ya I Babah nampi danda, ya I Nyonyah masasimbing saking saru, "Cangkeme tempuh timbungan, sikep galak desek pitik".
2. Dadi beler tong nyak ngamah, jeneng jelma betek malu layah duri, amonto ya raris pesu, ka kantor padidian, bané keweh makita pacang mabanyu, yan majujuk meh katara, yan nyongkok awake pelih.
3. Yan beli kadi ring ayam, kalu bojog mati tegil, mua wanci tembuyukan, ikute regreg carungcung, pantes tongosang di teba, rebut muring, matané bengul pilaran.