Pura Taman Limut
 | |
|---|---|
| Inpormasi umum | |
| Tipe | Pura |
| Pakem Undagi | Bali |
| Genah | Desa Adat Pengosékan, Kecamatan Ubud, Kabupatén Gianyar |
| Koordinat | 8°31′56″S 115°15′50″E / 8.532146989546433°S 115.26392825710573°E |
Pura Taman Limut inggih punika silih tunggil pura sad kahyangan sané magenah ring Desa Adat Pengosékan, Kecamatan Ubud, Kabupaten Gianyar, Bali.[1] Ring pura puniki wénten tetamian gelungan pingit sané kasungsung olih kramané irika. Gelungan pingit puniki sampun katangiang dados sesolahan sané ketah kebaos sesolahan Jogéd Pingit utawi gandrung. Gelungan pingit puniki pinaka tetamian saking Ida Pedanda Sakti Wawu Rauh majeng ka okan ida sané maparab Ida Mas.[2]
Kawéntenan Pura Taman Limut maiketan ring sejarah pamargin Ida Pedanda Sakti Wawu Rauh ka Bali. Ida Pedanda Sakti Wawu Rauh madué oka petang diri ring Desa Mas, silih tunggilnyané maparab Ida Buk Jambé utawi Ida Mas. Ida Mas saking Desa Mas selanturnyané nyeneng ring Desa Munduk Galang. Santukan Ida madué tetamian gelung sakti, Ida taler kasengguh Ida Pandita Sakti Magelung. Ring Munduk Galang Ida raris ngwangun tetamanan.
Sedek dina anu, tetamanan punika karusak olih prajurit miwah kuda druén utusan saking Kerajaan Mengwi inggih punika I Gusti Ngurah Mambal tur kudannyané mawasta Panandang Kajar. Ida Pandita Sakti Magelung raris kroda tur ngepung kudané punika. Ida taler nyampar kudané antuk sedah basé sané sampun kamantrain. Pamuputnyané kuda punika padem. Ritatkala ngepung kudané puniki wénten genah sané kapastu inggih punika Banjar Silungan, Banjar Sampara, Carik Kandangan, miwah Carik Soca.
Selanturnyané I Gusti Ngurah Mambal pacang ngegebug Ida Pandita Sakti Magelung santukan kudannyané sampun kapademang. Ida Pandita Sakti Magelung nglawan I Gusti Ngurah Mambal antuk kasaktian druéné. Ida nyamparang sekar ring sisi kuah Munduk Galang sinah genahé punika ngawinang prajurit Mengwiné jejeh tuh genahé puniki kawastanin Banjar Nyuh Kuning. Raris sekar malih kasamparang ka alas krésék sané ngawinang genahé punika bet tur raris genahé puniki kawastanin Banjar Pengosekan.
Ida Pandita Sakti Magelung raris ngelarang semadi ring Munduk Galang. Semadi punika ngawetuang andus utawi limut tur ida raris moksa ring genahé punika. Duaning kawéntenan limut puniki raris genah ida moksa kawastanin Pura Taman Limut. [2]
- ↑ NusaBali. "Kethu Senilai Rp 25 Juta Raib". www.nusabali.com (ring Inggris). Kaaksés 2024-08-18.
- ↑ 2,0 2,1 "Pura Taman Limut, Pengosekan, Ubud, Gianyar". Kaaksés 2024-08-18.