Museum Subak

Saking Wikipédia
Museum Subak
musĕhumsubak·
Peta
Kaadegang1981
GenahTabanan, Bali, Indonésia

Museum subak inggih punika silih tunggil museum sané wénten ring Bali. Museum Subak madaging informasi indik sistem irigasi utawi pengairan sawah tradisional Bali sané mawasta subak. Museum puniki wénten ring Kota Tabanan, Provinsi Bali. Museum Subak ngwedar indik sistem subak ring Bali sané madasar Tri Hita Karana. Tri Hita Karana inggih punika tatiga konsep sané prasida ngawinang bagia utawi kerta raharja ring sekala miwah niskala.

Sejarah[uah | uah wit]

Museum Subak kawangun olih I Gusti Ketut Kalér ring tanggal 17 Agustus 1975. Tatujon I Gusti Ketut Kalér ngwangun museum puniki mangda prasida nglestariang sistem Subak tur prasida dados silih tunggil warisan budaya bangsa Indonésiané, Sistem subak sampun wénten ring Bali ri tatkala masa Bali Kuno kirang langkung abad ka-11 tur ngantos mangkin krama Baliné tetep nganggén sistem subak puniki. Ring Oktober 1981, Museum Subak karesmiang olih Gubernur Bali, sané ri tatkala punika Prof. Ida Bagus Mantra. Koléksi museum puniki inggih punika alat-alat pertanian tradisional sané sasai kaanggén olih krama Baliné.

Bangunan[uah | uah wit]

Museum puniki kakepah dados kakalih inggih punika museum induk miwah komplek museum. Museum induk kakepah malih dados kakalih inggih punika gedung utama sané kaanggén pusat informasi miwah gedung pameran, ruang audio-visual, ruang malajah, perpustakaan, kantor, miwah miniatur sistem irigasi subak. Taler komplek museum sané marupa sawah-sawah sané nganggén sistem subak. Ring makakalih gedung punika, prasida kacingak alat-alat tradisional Bali tur proses pengolahan sawah saking awal ngantos puput.[1]

Pustaka[uah | uah wit]

  1. "Museum Subak, Bali". www.bali.com. Kaarsipin saking versi asli tanggal 2020-04-11. Kaaksés 2020-04-11.