Museum Néka

Museum Néka

Museum Néka
Kaadegang	1982 (1982)
Genah	Kecamatan Ubud, Kabupatén Gianyar, Bali, Indonésia
Tipe	Museum lukisan

Museum Néka inggih punika silih tunggil museum sané wénten ring Bali. Museum puniki magenah ring jalan raya Campuhan, Désa Kedéwatan, Kecamatan Ubud, Kabupatén Gianyar, Bali. Wasta museum puniki mawit saking wasta guru sané nyeneningin séni mawasta Sutéja Néka. Museum puniki kaadegang ring warsa 1982 olih Sutéja Néka. Museum punika kadagingin sareng makudang-kudang koléksi lukisan miwah benda seni sané kadruwénang. Museum Néka taler kadagingin sareng keris miwah patung sané mawit saking sajebag wawengkon ring Nusantara.

Ring Museum Néka, wénten lukisan sané kakaryanin olih maéstro Affandi. Dané kasub dados pelukis sané waged ring Indonésia. Lukisan punika nénten wantah kasub ring Nusantara manten, taler kasub ring krama mancanegara. Lukisan sané kakaryanin olih Affandi ketahnyané ngaryanin anak sané nyingakin angob, lukisan dané sané wénten ring Museum Néka sakadi lukisan Tari Barong & Rangda ring warsa 1973 sané ukurannyané 100 x 185 cm miwah lukisan Perahu Nelayan ring warsa 1975 sané ukurannyané 103 x 129 cm.

Ring museum Néka, taler wénten lukisan mawasta Penari sané kakaryanin ring warsa 1990 tur madué ukuruan 143 x 295 cm, lukisan punika kakaryanin olih pelukis Bagong Kussudiardjo. Dané dados koréografer kasub ring Indonésia. Ring Museum Néka, taler wénten makudang-kudang koléksi keris sané mawit saking sajebag wawengkon Indonésia. Wénten keris sané mawit saking jaman kerajan Bali sakadi keris Ki Baju Rantai sané mawit saking Puri Karangasem. Wénten taler keris Ki Gajah Petak sané mawit saking Puri Kanginan Singaraja ring pasisi kaja Bali. Keris-keris sané wénten ring museum punika kaupacarin ring rahina Tumpek Landep. Wangunan museum Néka nyihnayang wangunan khas Bali, lukisan ring museum puniki wénten langkungan saking 300 lukisan.