Mitos Bukit Buung Batu Majalan
Mitos Bukit Buung Batu Majalan inggih punika silih tunggil cerita rakyat sané wénten ring Desa Adat Pengosekan, Kecamatan Ubud, Kabupatén Gianyar, Bali. Mitosé puniki nyritayang indik utsaha Ida Déwi Danu nguwah jagat Pengosekan dados danu miwah bukit mangda sekadi palemahan ring Batur, Kintamani. Utsaha puniki raris katulak olih pandita sané mayoga irika sinah utsahané nénten durus kamargiang utawi buung [1].
Mitos puniki mawit saking Désa Adat Pengosekan, Kecamatan Ubud, Kabupaten Gianyar utaminnyané ring persawahan sané wénten ring tanggu sisi kelod Désa Adat Pengosekan. Persawahan puniki ketah kabaos Carik Labak utawi dumunan kawastanin Munduk Galang. Ring persawahan punika mangkin wénten kalih pura inggian punika Pura Bukit Sari miwah Pura Bukit Mentig pinaka parhyangan Déwi Danu miwah Bhatara Gunung Lebah sané pinaka tokoh ring carita Mitos Bukit Buung Batu Majalan.
Mitos Bukit Buung Batu Majalan nyritayang indik utsaha Ida Hyang Déwi Danu pacang nguwah jagat Désa Adat Pengosekan dados danu miwah bukit mangda kaluwihané sekadi kaluwihan palemahan ring Batur, Kintamani. Ida madué kayun sekadi puniki duaning nyingak kaluwihan palemahan ring Désa Adat Pengosekan. Utsaha puniki katulak olih Ida Brahmana Gunung Sari duaning wantah irika Ida manggih genah suci tur maambu miik pinaka genah becik nglarayang yoga samadhi.
Ida Hyang Déwi Danu raris krodha duaning makwéh utsaha sampun kamargiang sakadi munduhang batu anggén bukit, ngembahang toya miwah ngagah tanah anggén danu. Manggih paindikan sekadi punika, Ida Brahmana Gunung Sari raris nunas paica majeng Ida Bhatara Gunung Lebah mangdané ngwantu ngawaliang kahanan palemahan sekadi jati mula. Utsaha puniki prasida katulak taler sangkanin wénten pangangon bébék sané ngetarang malarapan antuk gending bukit buung, batu majalan. Ida Bhatara Gunung Lebah taler nglarang japa mantra mangdané saluir batu, toya, miwah bangbang sida makeber tur mawali sekadi jati mula. Niki sané kabaos batu malajan sane ngawinang bukité buung kawangun [1].
- ↑ 1,0 1,1 Dewi, Ni Putu Novsa; Suardiana, I. Wayan; Sutika, I. Nyoman Duana (2023-02-24). "Mitos Bukit Buung Batu Majalan di Desa Adat Pengosekan: Analisis Ekologi Sastra". Humanis (ring Inggris). 27 (1): 53–64. doi:10.24843/JH.2023.v27.i01.p06. ISSN 2302-920X.[permanent dead link]