Luh Sari

Aksara Latin

Aksara Bali

Luh Sari
Satua
Aran	Luh Sari
Data
Negara	Indonésia
Wewidangan	Bali

Satua Luh Sari (aksara Bali: luḥ​sari) inggih punika silih tunggil satua Bali.

Daging satua

Pan Sari tekén kurenanné Men Sari ngelah koné pianak luh adiri madan Luh Sari. Pianakné ento mara koné matuuh telung oton, tur sayanganga pesan. Sasubanné Luh Sari matuuh nem oton, lantas méménné mati; sapaninggal méméné keweh pesan kone jani Pan Sari, krana ia anak tuara. Yan kalahina panakné ka umané, tuara ada ngempuang, jumah budi bareng ajak ka umané, padalem krana ia enu cerik. Kanti berag kone jani Pan Sari ngenehang buat kalacuranné dadi jiema. Sasubanné Luh Sari matuuh kutus oton, ditu bapanné nglimbakang kenehné, lantas buin ia ngalih timpal. Jani inganan ia makeneh, krana suba ada tundena ngempuang pianakné jumah, di nujuné ia luas ka carik, tur jani ada suba ané nyakanang.

Kacrita, kurenan Pan Sariné jani sing pesan koné iyeng ngelah panak kualon. Sabilang Pan Sari tusing jumah, setata koné anake cerik maan munyi tan rahayu, tur pepes tigtiga. Budi Luh Sari morahan tekén bapanné tusing bani, krana ia takut pesan tekén reramené, jalané ia tawanga masadu tekén bapanné, tan pariwangde ia lakar maan bongkol sampat. Jela kénkén tuara madaar koné anake cerik, apa buin nasi, yeh koné tuara baanga ia nyemak ka paonné. Yan nuju ja bapanné jumah, dini sayanganga pesan Luh Sari, sakita karepné nagih madaar baanga dogenan. Mara dogenan ko ilid lawat kurenanné, pesu suba munyinné ané tra karoan-karoan.

Sedek dina anu, semengan pesan koné bapanné luas ka carik, krana ia lakar ngajakang magaé di uma. Kurenané repot koné jumah nyakan, krana ia nguun anaké magaé ajaka adasa. Dugasé euto, Luh Sari tusing pesan runguanga, kanti suba lingsir anaké cerik tusing baanga nasi. Baan tuara dadi baana naanang basangné seduk, laut ia ka paon ngidih nasi tekén méménné, kené munyinné,

“Mémé, mémé baang ja icang ngidih nasi asopan, seduk gati basang icangé, uli tuni icang tonden ngamah!"

Mara keto munyin anake cerik, laut méménné nyemak saang kandikan, sahasa jog manigtig tur mamatbat, kené munyinné,

"Dadi iba juari pongah nagih ngidih nasi tekén kai, apa suba sakayan ibané tampin kola, dadi tra dadi padengin nagih nidik. Eda buin iba tuara ngudiang-ngudiang, kai katiman uli mara kepit matan kainé baan nyagjagin bungut paon, kali jani konden ngamah.” Kéto pamunyin méménné, laut nyemak aon tekén katampalan wadahina kau, laut baanga Luh Sari.

“Ne..né.., nasi amali telahang!" Mara keto munyin méméné, ngeling koné Luh Sari mangilngilan, inget ia tekéning iba lacur, katingalin baan memé, tur lantas ia pesuan. Teked di wangan, nepukin koné ia anak mutbut siap. Bulun siapé ento lantas duduka tekén Luh Sari, pacek-pacekanga sig awakné. Ditu laut ia makeber ka punyan bunuté. Suba teked ia ba duur, ditu ia buin ngeling tur masasambatan, kené munyinné,

“Mémé, mémé, dija sih mémé nongos, ajak ja tiang bareng-bareng, sing kodag tiang nongos jumah, sai sai dadi tetigtigan dogen tur baanga tiang nasi aon ma be katampalan." Suud ia ngame-ngame méménné, laut ia magending,

“Au, au, ganggonggang gringsing kuning amahmu, jaanan buah bunuté tekén nasin i méméné nguel. Gakgak gem, sulageh siar katemplung.”

Dugase ia masasambatan keto, nuju pesan bapanné majalan di betén punyan bunuté sig jalan Luh Sariné nongos. Dadi dingeha ada anak ngeling ba duur tur masasambatan. Mara ia matolihan menek, tingalina pianakné sedih. Ditu sahasa ia menek sambilanga ngeling ngalih pianakné ajaka tuun, lantas butbuta bulun siapé ané ada di awakné, Suba suud keto lantas ia nyemak saang kandikan tur jagjagina lantas kurenanné. Sing ja matakon buin, jag suba agelina kurenanné kanti nyelé ati, Disubanné inget ané luh tekén dewek, lantas ia tundunga tundena mulih.