Kakawin Sumanasantaka
| Kakawin Sumanasantaka | |
|---|---|
| Soroh | Susastra |
| Basa(-basa) | Basa Kawi |
| Lakaran | Lontar |
| Ukuran | cm x cm |
| Format | Kakawin |
| Aksara | Aksara Bali |
| Ngranjing Koleksi ring | Perpustakaan Kongres Amerika Serikat |
| Klasifikasi Gedong Kirtya | Itihasa |
Kakawin Sumanasantaka inggih punika silih tunggil soroh kakawin mabasa Jawa Kuno ring abad telulas sane kakaryanin olih Mpu Monaguna. Pangawi saking Kediri puniki ngaryanin kakawin Sumanasantaka mawit saking mahākāvya Raghuvaṃśa sane kakaryanin olih Kālidāsa, pengawi kasub ring abad kalima saking India. Kakawin puniki kakawitin antuk manggala, kalanturang antuk daging cakepan, tur kapuputang antuk epilog. Kakawin Sumanasantaka madaging sawatara siu satus pada. Manggala ring kakawin puniki madaging wantah kalih pada. Punika taler epilog sane madaging tigang pada sane bawak.
Indik murda kakawin puniki nenten janten witnyane. Frase sumanasāntaka mawit saking kruna sumanasa lan antaka maarti 'mati sangkaning sekar sumanasa', punika nenten wenten ring Raghuvaṃśa. Lianan ring punika, murda sakadi nika nenten kauningin ring kasusastraan Sanskerta. Sakewala sane kawastanin 'sekar sumanasa' minab mawit saking kruna 'sumanas', sane ring basa Sanskerta akeh madue arti, minakadi: wikan; rapah; dewa; (jamak) wastan golongan dewa; (jamak utawi kruna satma) sekar-sekar; sekar melati ageng. Zoetmulder nyutetang inggih punika kruna sumanasa wenten anggen nyambatang punyan-punyanan lan sekar sane asoroh utawi mesib sareng campaka.[1] Puniki prasida kacingak ring kruna campaka sane kaangen ring kutipan Kidung Sumanasantaka.
- ↑ Josephus), Zoetmulder, P. J. (Petrus (1974). Kalangwan : a survey of old Javanese literature. The Hague: Martinus Nijhoff. ISBN 9789024716746. OCLC 2283518.