I Yuyu Ngwales Budi

I Yuyu Ngwales Budi
Satua
Aran	I Yuyu Ngwales Budi
Taler mamurda	Pan Karsa
Data
Negara	Indonésia
Wewidangan	Bali
Liyanan	é

Satua I Yuyu Ngwales Budi (aksara Bali: ᵒi​yuyuṅwal̥sbudi) inggih punika silih tunggil satua Bali.

Daging satua

Duk ané malu ada kaceritayang Yuyu ané idup di tukadé. Rikala masan panes gedé tur tusing ada ujan, yeh tukadé nyat, tur I Yuyu ané idup ditu ngemasin mati. Yuyu ané mati ento kepanggihin olih Ida Pedanda Sakti. Ri kala ento ida Pedanda ngicenin bebayon kaping I Yuyu buin idup.

Kacerita jani, yuyuné ento mewali idup, kewala awakné berag tigrig, wireh tusing maan yeh tur ngamah. Wireh kapitulungin Ida Pedanda, I Yuyu berag totonan kebakta ké telaga druwen Ida Pedanda di pesraman. Kasuwen-suwen, gedé suba ia I Yuyu, tur awakné mokoh.

Kaceritayang jani, ri kala sasih kalima Ida Pedanda merem ring pemereman Idané. Kala Ida sedek merem saget teké I lelipi ajak I Goak. I Yuyu suba nawang tekén solahé I Lelipi ajaké I Goak ané jelé. I Yuyu minehang, patekan ia ajaké dadua sinah lakar nyangkalain Ida Pedanda. Sinah suba ia ajaké dadua lakar nyegut tur nyedayang Ida Pedanda. I Yuyu mapineh ento madan bikas anak jelé. Sawireh ia nagih ngamatiang manusa ané ngelaksanayang kedharman.

Wireh, I Yuyu merasa mautang budi tekén Ida Pedanda. Ditu I Yuyu mepineh kenken carané apang nyidang nulungin Ida Padanda. Sing jé makelo lantas I Yuyu maan daya, tur meorahan kené.

“Ih iba Lelipi ajak Goak icing suba nawang dayan iba ajak dadua. Iba lakar ngugut Ida Pedanda apang seda. Ida Pedanda anak meraga wikan, dharma, tur sakti, sinah suba nyidang cai ngematiang ajak dadua. Jani icing lakar mapitulung tekén cai, sawiréh cang dogen ané nawang kesaktian Ida Pedanda”. Kéto I Yuyu mepajar tekén I Lelipi miwah I Goak nyaru-nyaru.

Disubané I Yuyu memunyi keto, I Lelipi tekén I Goak kaliwat demen atiné, sawiréh tulunginé tekén I Yuyu ané nawang kesaktian Ida Pedanda. Di subané keto, I Yuyu buin ngorahin I lelipi ajak I Goak.

“Yen cai ajak dadua don ngematiang Ida Pedanda, jani icing ngorahin pejalan, jani cai ajak dadua apang sida ngandong awaké menek kemé ké pemereman Ida Pedanda. Kapit icing ané tengebot apang nyangket di baong cai I Goak. Di subané keto,mara lantas penekang icing kepemeraman Ida. Ditu lantas icing lakar nyepit kanta Ida (baong Ida). Sawireh kesaktian Ida megenah di ulu kanta Ida."

Jani gelisang cerita, I Yuyu suba kegandong ajaka dadua. Lantas keaba ké tongos pemereman Ida Pedanda. Ri kala keaba ké tongos pemereman Ida Pedanda. Ri kala ento, I Yuyu nyepit baong I Lelipi ajaké I Goak kanti pegat maka dadua, laut makadadua ngemasin mati. Sujatiné Ida Pedanda Sakti anak sampun uning tekén pengrauh baya totonan. Sakewala Ida Pedanda meneng. Ida mapekayunan apa ada jalané ia I Yuyu mewales budi tekéning Ida Pedanda.

Kéto koné laksanan ipun I Yuyu, mewales utang budi tekéning Ida Pedanda. I Yuyu merasa bagia pisan, sawiréh ia maan mayah utang urip tekéning Ida Pedanda. Yadiastun keto, I Yuyu sing ja matilar uling telagané Ida Pedanda. I Yuyu tetep nongos di Telagané, tur memarekang ring Ida Pedanda sané ngelarang dharma pandita. Kéto suba pelaksanaan ia I Yuyu ané melah.