I Wayan Sadha
| I Wayan Sadha | |
|---|---|
| Embas | 29 Juli 1948 Jimbaran, Badung, Bali |
| Séda | 28 Januari 2015 (yusa 66) |
| Mabangsa | Indonésia |
| Kauningin | pangawi sastra Bali |
I Wayan Sadha (embas ring Jimbaran, Badung, 29 Juli 1948 – seda 28 Januari 2015 ring yusa 66)[1][2] inggih punika silih tunggil pangawi miwah kartunis Bali. Dané naanin masekolah among kantos kelas 2 Sekolah Rakyat. I Wayan Sadha madué akeh pengalaman ngenénin indik réalitas sosial duaning, dané polih makarya dados bendéga, buruh, dagang, tukang kebun, poto graper keliling, kantos dados wartawan miwah sané paling untat wantah dados kartunis miwah pangawi. Dané sané ngripta tokoh kartun kuluk “Somprét” sané kentel antuk unsur satir ngenénin indik problematik sosial miwah budaya Bali.
Dané sering nyarenging paméran kartun sareng para perupa ring Dénpasar, naanin kaundang paméran sareng Prakarti ring ARMA Muséum, Ubud, Bali Biénnalé miwah sané lianan. Naanin polih juara III Photo “Pariwisata Bali 1981” miwah hadiah Sastra Rancagé 2010 antuk cakepannyané sané mamurda “Léak Pamoroan”. Kakawian-kakawian dané sané marupa kartun miwah satua cutet naanin kamuat ring Majalah The Archipélago, Énglish Corner, Bali Écho, Harian Nusra, Majalah Sarad, Majalah Poléng, miwah Majalah Taksu. Naanin dados narasumber ring acara Sandyakala Sastra #5 warsa 2010 sareng Ida Bagus Wayan Widiasa Kenintén ring Bentara Budaya Bali.[3]
Cakepan-cakepan dané sané sampun kawedar inggih punika:
- Bali di Mata Somprét (Kartun, 1994)
- The dog of Bali Somprét utawi "Celotéh Anjing Bali" (Kartun, 2008)
- Léak Pemoroan (Pupulan satua cutet, 2009)
- Paruman Betara (Pupulan satua cutet, 2014)
- ↑ Bali, Relawan Bentara Budaya (2015-02-27). "Sandyakala Sastra #43: Obituari I Wayan Sadha". Relawan Bentara Budaya Bali (ring Indonesia). Kaaksés 2021-12-04.
- ↑ "Mengenang I Wayan Sadha, Kartunis Jelata". BaleBengong.id. 2015-03-09. Kaaksés 2021-12-04.
- ↑ "Profil I Wayan Sadha". suarasakingbali.com. Pébruari 2016. Kaaksés 9 Pébruari 2020.
