Gending Bobotoh

Saking Wikipédia


Aksara Latin
     
Gending Bobotoh
Satua
AranGending Bobotoh
Tasih kasub maaranPan Karsa
Data
NegaraIndonésia
WewidanganBali

Satua Gending Bobotoh (aksara Bali: gĕndiŋbobotoḥ) inggih punika silih tunggil satua Bali. Satua puniki kasurat olih Ida Bagus Rai Putra ring buku Puspa Sari 2, Sabha Sastra Bali.[1]

Daging satua[uah | uah wit]

Satuuh idupne ngulurin indria. Memotoh adanina ngulurin momo. Momon kenehne ngulurin momo. Momon kenehne etohina. Sangkala ada anak nyambatang mamotoh sujatine ngetohin momon keneh. Selid sanja ngecelin siap, tengaine mandusang siap, sanjane medesin mombong siap. Semenganne ngempuang siap. Tuah i siap ane sida nyiepang kenehne. Lemah peteng kedengan angkihan kenehne pragat di kalangan tajenne. Di nuju lakar ngoceke, tusing pesan ngrunguang payuk jakan. Panak nyebak nagih beliang baju ane anggona di awakne suba uek brengbeng.

Kurenane nagih pipis anggona meli lakar jakan. Sakewala pragatanga aji raos bangras.

"Sajan nyai panak nyah. Nglantud-nglantudin pejalan icange luas ka tajen. Tusing mirib nyai nawang?"

"Ne... ene apang nyai nawang, ane biying alab sangkur janggaran, manggo-angoan sandeh jambul godeg drupa dimpil karo uli désa Plaga ratun turas siape. Sangkala madan biying pamlagaan, sanggup mapalu tur ngalahang musuhne di tengah kalangan tajenne.

"Beli suba ngadepang carike di labakane duuran kauh, mula tuah anggon ngetohin I biying plaga. Mirib ento nyai ngelah sisan buntilan ane kadut nyai di sabuke? Deh... Deh mai aba!! Jalan telahang anggon ngetohin i biying plaga. Etohin aji sekancan kesugihan awake. Apang tawang nyai siape nenenan sanggup mekelin nyai manik sekecap, sugih nadak haha.. ha.. ha.. ha!!!"

'"Cendekne enden malu meli lakar jakan. Nyanan menang, nah .... ditu mara meli lakar jakan. Utawi eda nyai buin nyakan, jeg baas lebeng, nasi ajak daaranne beli. Cundang siape anggon kuah, jambal!"

"Cai panak bapa eda nyebak. Kenyingan iban caine!! Nyanan menang bapa meliang cai baju anyar. Nah.. Ditu kenken keneh caine? Akuda keneh caine meli baju? Ane mawarna kenken kenehang cai? Eda ke lebihan tekénang lebak tali, Bapa sanggup meliang. Kenken keto, kebot kenawan liman caine nyekel pipis manjer sate, hi.. hi.. hahahaha."

Luhne laut mabat, "Kenken Beli? Kaden ngelah carik tuah di labakane duuran kauh dogen, jani ento gadeang Beli anggon ngulurin indria. Sekayan Beline uli dija totonan, dadi gadeang? Mirib Beli ane meli carike ento? engsap mirib Beli? Nangke sautin icang! Kaden carike totonan aban-aban icang nganten, pabaang reraman icange jumah kangin mapan Beli tawanga tusing ngelah ebuk. Prade ento kanti adep Beli, icang lakar mrakaraang. Icang lakar mulih, palas makurenan ajak Beli!".

Muanine tusing masaut apa buin. Mageres nyemak krepe nyelepang siap laut maklies mesuang tusing nolih laad. Kacrita siapne kalah! Teked jumah bedak layah. Dapetanga umahne suung, somahne ajak pianakne tusing ada jumahne. Cara jlema punyah gelur-gelur ngaukin kurenanne. Matane barak, macelep kapaon napetang payuk puyung. Payukne pantinganga. Piring?? Piring makeber. Gentong?? Gentong kajeta. Makejang ane tepukina tusing baanga beneh. Aget luhne ajak panakne enu di pisaga ngidih nasi, yéning keto meh-mehan lampuga tendasne.

Tusing teked ditu dogen inguh bayune. Kanti ka para Dewa gedégina. Makejang batarane ubat-abita, leluhurne orahang tusing sueca. Makejang temaha. Sanggahne uuga, tusing canang sari aturina, sakewala tain sampi aturina atamas.

Pustaka[uah | uah wit]

  1. Budiasa, Sobat. "Satua Mebasa Bali : Gending Bebotoh". Rare Angon. Kaaksés 2021-05-27.