Bambang Ekalawya

Aksara Latin

Aksara Bali

Bambang Ekalawya
Satua
Aran	Bambang Ekalawya
Data
Negara	Indonésia
Wewidangan	Bali

Satua Bambang Ekalawya (aksara Bali: bambaŋ​ᵒekalawa) inggih punika silih tunggil satua Bali.

Daging satua

Kacrita Ida Bhagawan Drona sampun kaloktak ring jagaté, kalaning ida ngemban saha ngurukang para murid-murid nyané, makadi Sang Korawa lan Sang Panca Pandawa. Sayan-sayan kasumbung Ida riantukan prasida niwakang aji pepanahan, mawastu akeh para murid-murid idané wikan ring aji pepanahan punika. Murid idané sané pinih wikané ring widang mepanahan mawasta Sang Arjuna, murid idané sané wikan ring senjata gada, Ida Sang Bima. Sané wikan ring ilmu pedang, Ida Sang Sahadewa, sané wikan ring ilmu agama, Ida Sang Yudistira, Sang Nakula wikan ring sanjata keris. Cutet ipun Sang Panca Pandawa, sané setata molihang juara ring ujian sané kelaksanayang olih sang Guru. Riantukan asapunika, sayan-sayan gedeg  utawi iri ring Sang Panca Pandawa manah nyané Sang Korawa.

Mangkin kacrita, indik Ida Bhagawan Drona dados guru ring Astina Pura sampun kasiar ring dura negara, pamakesnyané ring jagaté. Sané mangkin kacritayang wénten putran para ratu dura negara, mawasta Bambang Ekalawya, mapakayun jaga maguru aji pepanahan ring Ida Sang Bhagawan Drona. Raris ida lunga ke puri Astinané. Disampuné rauh irika, raris ida kasambrama olih Ida Bhagawan Drona, irika Ida nguningayang pisarat idané rauh, gumanti wantah nunas ajah ring Ida Bhagawan Drona. Diwawu piragi atur ida Bambang Ekalawya asapunika, raris Sang Bhagawan nyawis, "Nah kéné cening, Bambang Ekalawya, yan buat sarat cening buka kéto, bapa suba prasida tatas. Kéwala ada nyén cening salah tampi tekén bapa Drona."

Raris lunga ida katengahing alas. Ring alasé sané madurgama, irika ida Bambang Ekalawya ngelaksayang niyasa, tur makarya patung kayu sané marupa Bhagawan Drona. Disampuné puput patungé punika kekaryanin, raris ida ngawitin muruk mepanahan. Sadurungé ngawit muruk, ida tan lali ngastawa patung Ida Bhagawan Dronané, asapunika parilaksanan ida nyabran rahina wengi. Kasuen-suen, riantukan sangkaning emet idané melajahang raga, raris gelis ida Bambang Ekalawya wikan ring aji pepanahan. Ida presida mentangang panah apisanan dasa siki.

Né mangkin, caritayang Sang Panca Pandawa sareng satus Korawa sampun puput kaicénin peplajahan olih Ida Bhagawan Drona. Raris Sané mangkin, kauji para murid idané sami. Ngelaksayang pituduh idané, mawinan sagrahan sami memargi katengahing alas, jangkep makta senjata soang-soang. Sesampuné rauh ring alasé, sami murid-murid idané ngandupang cicing nyané soang-soang mangda ngaruruh buron alas. Disampuné cicingé ngalurug katengah alasé gedé, raris wenten cicng sané manggihin Bambang Ekalawya sedeng muruk mepanahan, cicinge ento ngongkong. Irika raris Bambang Ekalawya manah bungut cicingé ento. Raris cicinge ento melaib, disampuné cicingé ring ajeng idané sami, raris cicingé mati. Irika Sang Arjuna nuréksa sané mawinan cicingé mati. Kapanggih wenten dasa katih panah ring bungut cicingé. Raris Ida nutugin getih cicingé sané néltél selantang jalan. Irika kapanggih Bambang Ekalawya sedeng mepepanahan. Sang Arjuna metakén ring Bambang Ekalawya, apa krana manah cicing idané. Bambang Ekalawya mesaur, nika riantukan cicingé ngongkong rikala ida melajah mepepanahan. Malih Sang Arjuna metaken, sira sané ngurukang meepepanahan. Bambang Ekalawya nerang sané ngajahin mepepanahan wantah Bhagawan Drona.

Raris Sang Arjuna sareng sametoné sami mewali ke Astina. Ring Astina Pura, Sang Arjuna ngaturang bobab. Bhagawan Drona ngandika, "uduh cening Sang Arjuna, indik apan bapa bogbog?" Raris Sang Arjuna nuturang indik napi sané kepanggih ring alasé. Bhagawan Drona malih ngandika, "Nah yéning keto, atehang bapa ka tongosé ento." Gelisang satua, rauh ida Bhagawan Drona, Panca Pandawa lan satus Korawa ring genahné ida Bambang Ekalawya. Irika Bhagawan Drona mawacana, "Mai paekin bapa cening."

Bambang Ekalawya raris matur, "Napi mawinan ratu Bhagawan Drona, rauh iriki ring genah tiangé puniki?"

Bhagawan Drona ngandika, "kene cening, bapa ningeh orta, cening suba mekelo muruk mepepanahan, tur sané ngajahin tuah bapa, apa saja keto?"

Bambang Ekalawya matur, "Inggih ratu, patut sekadi punika."

Malih Bhagawan ngandika, "Nah, yéning keto, patut cening ngaturang punia tekening bapa, pinaka dasar ceningé nunas ajah."

Baca Juga: Satua Bali - I Dadong Dengkot

Mesaur Bambang Ekalawya, " Napi nika daksina sané patut aturang titiang ring i ratu?"

Bhagawan drona nerangang, "Kené cening, yan saja cening guru susrusa tekening bapa, ané idih bapa panak punia baktin ceningé tekén bapa, sing ada lén tuah ento inan liman ceningé ane tengawan."

Raris Bambang Ekalawya ngenjuhang inan limannyane ring sang guru, raris Bhagawan Drona ngambil keris nugel jrijin limane Bambang Ekalawya.