Wae Rebo
Wae Rebo utawi Waerebo inggih punika désa alit ring Kabupatén Manggarai, Nusa Tenggara Timur. War Rebo wantah silih tunggil genah wisata budaya ring Kabupatén Manggarai. Magenah ring tegah 1.200 meter ring baduur permukaan segara. Ring désa puniki tuah wénten 7 umah utama utawi sané kawastanin Mbaru Niang. Wae Rebo kadadosang pinaka Warisan Budaya Dunia olih UNESCO ring Agustus 2012. Wae ring basa Manggarai maarti toya. Désa Waerebo sampun mayusa 1.200 tiban miwah sampun ngranjing ring generasi ka-20, 1 generasi mayusa 60 tiban.
Manut lelintihan mitos krama drika, panglingsirnyané mawit saking Minangkabau, sané mawasta Empo Maro rauh saking Pulo Sumatera ngantos ka Labuan Bajo. Empo Maro malaibang raga saking désané sawiréh kapisuna miwah pacang kasédayang. Salanturnyané ia merantau ka makudang kota. Kapertama, ia meneng ring Gowa Sulawesi, lantas makisid malih ka makudang kota lianan. Ritatkala makisid, Maro matemu sareng anak istri. Lantas ia ngajakin rabiné makisid sareng-sareng. Ritatkala peteng Maro ngipi matemu sareng panglingsir sané mabaos majeng Maro antuk nyeneng ring désa Wae Rebo. Maro nuutin napi sané panglingsir punika baosang. Ia sareng rabiné ngrereh désa Wae Rebo punika. Sesampun nganteg ring Wae Rebo, Maro sareng rabiné idup miwah meneng drika.
Ring désa Wae Rebo wénten 44 kulawarga sané makarya ring bidang pertanian sakadi kopi, cengkéh miwah umbi-umbian. Pakaryan anak istri ring désa puniki wantah nenun miwah nulungin krama lanang ring kebun. Krama punika nganggén toya sané mawit saking pegunungan. Toya puniki kawastanin sosor, sané kakepah dados kalih inggih punika sosor lanang miwah sosor istri.[1]
- ↑ UWA (2022-04-27). "Wisata Budaya Wae Rebo". UWA (ring Inggris). Kaaksés 2024-08-18.