Usaba Guling
Usaba Guling utawi Usaba Dalem inggih punika silih tunggil upakara sane kalaksanayang nyabran warsa nemoning Sukra Pon Sasih Kawulu, ring Desa Timbrah, Karangasem.[1] Ngusaba guling puniki sampun wenten saking nguni tur kapiletin olih krama Desa Timbrah pinaka sarana bhakti majeng ring Ida Bhatara Durga sane malinggih tur kasungsung ring Pura Dalem Desa Timbrah. Ngusaba guling puniki matetujon nunas karahayuan lan karahajengan. Lianan ring punika, taler pinaka angayubagia miwah matur suksma antuk paica Ida Sang Hyang Widhi Wasa, marupa asil gumi minakakadi tetanduran lan ubuh-ubuhan.[2]
Kawastanin usaba guling saantukan ring upacara puniki, samian krama desane ngaturang be guling. Nanging nenten samian kapaksa utawi patut ngaturang guling bawi saantukan puniki sasidan-sidan, malantaran keneh sreda lan susrusa. Sane nenten mrasidayang ngaturang guling bawi, dados kagentosin antuk guling bebek. Ring Desa Timbrah wenten sawatara 850 kepala keluarga. Asing kepala keluarga punika ngaturang be guling mawinan be guling sane katur ring upacara puniki panyatusan akehnyane.[3] Rikala nyanggra upacara puniki, krama desane samian epot saling tulungin nragiang sarana upakara miwah piranti sane pacang kanggen. Wenten sane nampah bawi lan bebek ring margine utawi ring umahnyane soang-soang. Nglantur nguling miwah matanding banten.
Wusan katur lan nglaksanayang sarana pamuspan sareng sami ring Pura Dalem, krama desane nyurud aturan punika. Be guling lungsurane lantas kapurak tur kaejotang mailehan minakadi ring krama desa sane nenten mrasidayang ngaturang guling.[4] [5]
Pustaka[uah | uah wit]
- ↑ Sania, Sandra (2022-03-03). "Setiap Tahun Warga Bali Lakukan Tradisi 'Ngusaba Guling' Persembahkan Ratusan Ekor Babi - Banten Raya". Setiap Tahun Warga Bali Lakukan Tradisi 'Ngusaba Guling' Persembahkan Ratusan Ekor Babi - Banten Raya (ring Indonesia). Kaaksés 2022-10-14.
- ↑ ""Ngusaba Guling", Wujud Terima kasih Krama Desa Timbrah, Karangasem". Sirah Bali Info (ring Inggris). 2020-04-15. Kaarsipin saking versi asli tanggal 2022-10-14. Kaaksés 2022-10-14.
- ↑ Agency, ANTARA News. "TRADISI NGUSABA GULING - ANTARA News Bali". Antara News. Kaaksés 2022-10-14.
- ↑ "yourdomain.com". ww38.yourdomain.com. Kaarsipin saking versi asli tanggal 2022-10-14. Kaaksés 2022-10-14.
- ↑ "Mengintip Tradisi Hari Raya Galungan di Bali, Unik Ada Ngusaba Guling". iNews.ID (ring Indonesia). 2018-12-26. Kaaksés 2022-10-14.