Urak

Urak inggih punika silih tunggil tradisi lisan kabudayaan Bali sane wenten ring Banjar Tegeh Kuri Desa Adat Tonja. Tradisi Lisan inggih punika silih tinunggil tradisi sane mamargi tur ngalimbak antuk oral utawi majalaran antuk cangkem ngantos cangkem kramane. Urak manut ring kamus Basa Jawa Kuna polih artos "Giliran". Urak puniki nenten uning wetnyane, yaning sapunika, madasar antuk kadi sane sampun mamargi, maka sami kramane cumpu antuk ngamargiang "Urak" punika. Riantukan wenten lingsir-lingsire maosang, "Urak punika pinaka cihna bhakti iraga majeng ring sasuhunan Ida Ratu Ngalurah". Kocap Urak punika pralambangi iraga ring Ida Ratu Ngalurah mangdane kawetentenan kramane sida mamargi ayu utawi becik.