Umah Rakit
Umah Rakit inggih punika umah adat saking Provinsi Sumatera Selatan. Umah Rakit taler pinaka silih tunggil umah sané pinih tua ring Provinsi Sumatera Selatan, sané sampun wénten saking jaman Kerajaan Sriwijaya. Umah Rakit kawangun ring duur rakit miwah ngambang ring sisin tukad Musi, tukad Ogan, miwah tukad Komering. Mangda nénten anyud, Umah Rakit kaiket ring serdang utawi penambat. [1][2]
Umah Rakit mawiguna dados genah meneng, sakewanten tiosan punika Umah Rakit taler pinaka penginapan, gudang, miwah genah madolan. Jadma China sané ketahnyané madué swagina pinaka dagang akéh nganggén Umah Rakit pinaka sarana madagang. Tiosan punika, Umah Rakit kanggén taler pinaka sarana transportasi antuk sané nuénin, duaning dangan pindah saking genah siki ka genah sané tiosan. Wusan Kesultanan Palembang kakasorang olih Belanda, akéh para pendatang sané witnyané meneng ring Umah Rakit sampun pindah ngwangun umah ring dataran. [1]
Umah Rakit madue pinda persegi panjangg, umah puniki kawangun ring duur susunan balok kayu utawi tiing, miwah bataran umah kakaryanin antuk papan. Mangda bataranné tetep tuh, ring duur balok kayu madaging papan sané marerod. Mangda umah prasida ngambang, ring tebén kadagingin lanting. Lanting inggih punika pupulan carang tiing sané kaiket dados siki, a lanting madaging 100 tiing. Umah sané ukurannyané 9 x 12 meter perlu 7 lanting. Mangda wangunan Umah Rakit nénten pindah-pindah, makapatpat bucunnyané kapasang tiang sané kokoh. Wangunan kaiket antuk tali rotan. Raab Umah Rakit mapinda pelana antuk nganggén bahan don nipah, ambengan sané kaiket antuk tali rotan. [3][4]
Umah Rakit kakepah dados kalih genah. Genah ring ajeng kanggén genah nyanggra tamiiu miwah parikarama sarahina. Genah ring ungkur mawiguna pinaka pasirepan. Yening wenten pawaregan ring siki wangunan, pawaregan punika magenah ring sisi pasirepan. Sakéwanten wénten taler sane makarya pawaregan sane kapasahang. Jelanan ring Umah Rakit ketahnyane wenten kalih, siki majeng ka tukade, siki majeng ka darat. Jendelanyane, ketah magenah ring sisi kanan miwah sisi kiri jelanan umah. Riang ajeng umah wenten titi pangubung sane marupa akeping papan utawi rangkepan tiing. Umah Rakit nenten madue iasan, sakewanten ring Umah Rakit sane modern kaias antuk ukiran timbul khas Palembang sane mawarna barak ati miwah warna emas. [5]
- ↑ 1,0 1,1 Redaksi 1000guru (2017-04-11). "Rumah Rakit: Sejarah dan Eksistensinya". Majalah 1000guru (ring Inggris). Kaaksés 2023-02-15.
- ↑ "All about Palembang Tourism Destination". web.archive.org. 2019-04-03. Kaarsipin saking versi asli tanggal 2019-04-03. Kaaksés 2023-02-15.
- ↑ "Warisan Budaya Takbenda | Beranda". warisanbudaya.kemdikbud.go.id. Kaarsipin saking versi asli tanggal 2022-11-28. Kaaksés 2023-02-15.
- ↑ "Rumah Adat Rakit Palembang » Budaya Indonesia". budaya-indonesia.org. Kaaksés 2023-02-15.
- ↑ 0543033030, ICAN ZALIKA (2010-02-14). "RUMAH BARI DALAM KEHIDUPAN MASYARAKAT ADAT PALEMBANG (SUMATERA SELATAN)". Digital Library. Kaarsipin saking versi asli tanggal 2023-02-15. Kaaksés 2023-02-15.CS1 maint: numeric names: authors list (link)