Tugu Proklamasi
Tugu Proklamasi inggih punika tugu pangeling-eling ri sajeroning proklamasi kemerdekaan Republik Indonesia sane kawangun ring wawidangan Taman Proklamasi ring Jalan Proklamasi, Jakarta Pusat. Taman inucap ngenahin pecakan umah dane bapak presiden Soekarno ring Jalan Pegangsaan kangin nomer 56 sane mangkin sampun manados Jalan Proklamasi. Umahe punika maka genah pawacenan proklamasi kemerdekaan sane mangkin sampun kaicalang antuk kalebur nemonin warsa 1960-an. Ring wawidangan iraka taler wenten monumen kakalih patung Soekarno-Hatta sane ageng lan madampingan nganutin duk pawacenan proklamasi kemerdekaan. Ring tengahin patung inucap taler kawangun patung naskah proklamasi sane kabuat antuk batu marmer selem, sane sasuratan lan wentuk aksaranyane nganutin ring sajabanin mulanyane minakadi sane kaketik olih dane bapak Sayuti Melik lan kalingga tanganin olih Bung Karno lan Bung Hatta.[1][2][3]
,_1950-1960.jpg)
Wawidangan Taman Proklamasi magenah ring tanah sane dumun maka genah dane bapak Soekarno ring Jalan Pegangsaan kangin nomer 56. Dane Presiden Soekarno nyobiahang kemerdekaan Indonesia nemoning petekan masehi 17 Agustus warsa 1945 saking natah ambenan umahe inucap sane mangkin ketah kawastanin Gedung Proklamasi.
Sadurung katongosin olih dane bapak Soekarno lan istri dane kaping kalih sane mawasta Inggit Garnasih, umahe punika maka genah prajuru Belanda sane mawasta Baron van Asbeck ngawit warsa 1931 kantos kagentosin olih P. R. Feith ring warsa 1935, umahe punika maduwe natah sane linggah pisan lan wewangunannyane nganutin wewangunan sakadi eropa lan arsitektur sane kadi Art Deco.
Dane Bapak Soekarno ngenahin umahe inucap ngawit warsa 1942 kantos warsa 1946. Dane taler mutusang genahe punika pinaka genah Nyobiahang Proklamasi Kemerdekaan Negara Republik Indonesia antuk dasar pikayun santukan daweg punika Lapangan Ikada sane mangkin sampun kawastanin Monumen Nasional kantun kakuasaang olih para tentara Jepang.
Maka nyihcayang mikelingin wanti warsa sane kapertama kemerdekaan Indonesia, pamerintah indonesia ngawangun tugu pangeling-eling yadiastun wentuknyane alitan. Tugu punika kawangun duk warsa 1946 ring ajeng Gedung Proklamasi olih kelompok Ikatan Wanita Djakarta sane ketah kauningayang antuk Tugu Peringatan Satoe Tahoen Repoeblik Indonesia lan sane mangkin ketahnyane kawastanin Tugu Proklamasi.
Nemoning petekan masehi 1 Januari warsa 1961, Dane Bapak Presiden Soekarno ngaresmiang wewangunan Tugu Petir, sane mangkin ketah kawastanin Monumen Proklamasi sane selanturipun ring warsa 1972 pamerintah ngawitin ngewangun Gedung Perintis Kemerdekaan sane modern, taler ring warsane punika Tugu Proklamasi kalebur lan salanturnyane kawangun malih antuk wentuk sane pateh nginutin kasujatian mulannyane.
Ring petekan masehi 17 Agustus warsa 1980 sane mapaiketan ring HUT kaping 35 Proklamasi Kemerdekaan RI, kawentenan Monumen Pahlawan Proklamator Soekarno-Hatta sane ageng inucap karesmiang olih Dane Bapak Presiden Soeharto.
Ngalantur ring warsa 2000, Pemerintah Provinsi DKI Jakarta ngamargiang parikrama antuk ngalebur ri sajeroning kawentenan Taman Proklamasi antuk tatujon mangda sida kauningayang asapunapi wentuk wewangunan umah Bung Karno mangda sida kawangun malih ka wentuknyane sane kapartama kawangun. Kantos Mangkin sisan paleburan wentuk kapertama Umah Bung Karno punika kantun sida kacingak olih para janane sane mawisata ring Taman Proklamasi.
Ring Taman Proklamasi wenten tiga tuga sane kawangun, inggih punika: Tugu Peringatan Satoe Tahoen Repoeblik Indonesia, Tugu Petir, lan Monumen Pahlawan Proklamator Soekarno-Hatta. Ring ungkur puniki maka panlatarang ri sajeroning kawentenan tugu utawi monumen-monumen inucap.
Tugu Peringatan Satoe Tahoen Repoeblik Indonesia
Tugu Peringatan Satoe Tahoen Repoeblik Indonesia inggih punika pinaka monumen sane kapertama sane kawaangun ring Taman Proklamasi. Tugu inucap karesmiang duk warsa 1946, pamekas nemonin petekan masehi 17 Agustus warsa 1946 olih Perdana Menteri Sutan Sjahrir. Tugu pangeling inucap wentuknyane wantah obelisk alit sane madaging sasuratan "Atas Oesaha Wanita Djakarta", taler madaging cakepan kemerdekaan Indonesia, lan peta Indonesia, sane mangkin tugu inucap sampun kagentosin arannyane antuk Tugu Proklamasi
Tugu Proklamasi kakayunang olih makudang-kudang daa istri sane matunggilan ring Pemuda Puteri Indonesia (PPI) lan Wanita Indonesia, inggih punika Johanna "Yos" Masdani Tumbuan, Mien Wiranatakusumah, Zus Ratulangi (maka okan dane Sam Ratulangi), Zubaedah, lan dane Nyonya Gerung. Gambaran tugu pangeling punika kabuat olih Kores Siregar sane pinaka silih tunggil mahasiswa saking Institut Teknologi Bandung sane ngawangunnyane kakawitin duk saih masehi Juli warsa 1946. Santukan kawentenan pikobet sareng tentara sekutu sane kantun wenten ring wewidangan irika, wali kota Jakarta dane bapak Suwiryo purun antuk ngaresmiang wangunan inucap lan mapinunas majeng ring dane perdana menteri Sutan Sjahrir nemoning petekan masehi 16 Agustus warsa 1946 antuk maka pamucuk ri sajeroning acara paresmian tugu inucap. Dane Bapak Sutan Sjahrir sadia mucukin acarane inucap ngalantuk matulak ka Jakarta saking Yogyakarta.
Duk petekan masehi 14 Agustus warsa 1960, koran Keng Po ngalaporang parindikan kawentenan Angkatan '45 sane mapikayunan Tugu Proklamasi sane kawastanin "Tugu Linggarjati" mangda kaicalang. Malarapan kawentenan pikobete inucap, dane bapak presiden soekarno mamutus wewangunan inucap kaleburang kantos ring gedung proklamasine.
Ring warsa 1968, gubernur Jakarta Ali Sadikin ngajuang proposal antuk ngawangun malih tugu sane sampun kaleburang olih dane bapak Presiden Soekarno duk warsa 1960 inucap. Proposal punika kacumpunin lan ring patekan masehi 17 Agustus warsa 1972, Monumen Proklamasi karesmiang malih ring genahnyane sane sujati mula sane karauhin olih makudang-kudang tokoh publik lan politik, silih tunggilnyane mantan Wakil Presiden Dane Bapak Hatta.
Tugu Petir
Tugu Petir utawi Tugu tatit inggih punika wewangunan sane wentuknyane marupa tiang setinggi sane tegehnyane wantah 17 meter (56 ft) sane muncuknyane madaging pralambang petir utawi tatit. Monumen pangeling puniki maka cihna genah dane bapak proklamator Soekarno ngadeg ngawacen sasuratan proklamasi. Ring dasar monumen inucap madaging sasuratan antuk logam "di sinilah Dibatjakan Proklamasi Kemerdekaan Indonesia pada Tanggal 17 Agustus 1945 djam 10.00 pagi oleh Bung Karno dan Bung Hatta" Petir utawi tatit maka pralambang kawentenan proklamasi kemerdekaan Indonesia daweg punika makuus utawi makuug.
Monumen Pahlawan Proklamator Sukarno-Hatta
Monumen Pahlawan Proklamator Sukarno-Hatta madaging kalih patung antuk perunggu sane nyihnayang dane bapak Soekarno lan Hatta mairingan. Baat patunge nika siki-siki wantah 1.200 kilogram (2.600 pon), lan tegehnyane wantah 46 meter (151 ft) taler 43 meter (141 ft). Wentuk patunge punika kaambil saking foto daweg pawacenan proklamasi sane kapertama kawacen. Makakalih patung inucap ngapit lempengan batu perunggu sane maukuran 196 cm x 290 cm, antuk baatnyane wantah 600 kilogram (1.300 pon), sane nyihnayang cakepan daging proklamasi kemerdekaan Indonesia. Ring ungkur monumen punika wenten patung-patung patung-patung monolitik sane bernomer 17, antuk tegehnyane wantah 8 meter, lan 45 pamesuan yeh mancur, sane maka pralambang "tanggal 17 Agustus 1945", Monumen puniki karesmiang nemonin petekan masehi 17 Agustus warsa 1980.
- ↑ Okezone (2018-08-18). "Tugu Proklamasi, Riwayatmu Kini... : Okezone Megapolitan". https://megapolitan.okezone.com/ (ring Indonesia). Kaaksés 2023-03-06. External link in
|website=(help) - ↑ "JakartaTourism". jakarta-tourism.go.id. Kaaksés 2023-03-06.
- ↑ Ardanareswari, Indira. "Sejarah Miris Tugu Proklamasi, Monumen Persembahan Kaum Perempuan". tirto.id (ring Indonesia). Kaaksés 2023-03-06.