Tradisi Ararem
Tradisi Ararem inggih punika tradisi makta sarana pawiwahan saking anak lanang majeng ring kulawarga anak istri sané pacang kadadosang rabi. Tradisi puniki kalaksanayang ring adat suku Biak, Papua. Manut basa Biak, kruna "Ararem" madué artos sarana pawiwahan (maskawin). Ring upakara puniki, sarana pawiwahan kabakta majalan tur kasarengin olih para krama lianan, gagendingan, miwah sasolahan sané kairingin olih musik. Akéhnyané sarana pawiwahan punika kacumpuang olih kulawarga sané istri. Galah makta punika patut kacumpuang olih sang kulawarga anak istri tur kulawarga anak lanang. Ring tradisi Suku Biak, prabéya sarana pawiwahan punika dados upakara sané patut kalaksanayang krana mapaiketan sareng pawiwahan punika.[1]
Sané kapertama inggih punika sangkep antuk nyumpuang akéh sarana pawiwahan sané jagi kaaturang. Ring acara puniki, kulawarga sané lanang nakénang indik akéh maskawin sané katunas olih kulawarga sané istri. Yéning makakalih kulawarga sampun prasida cumpu, kulawarga sané lanang sampun dados mataki-taki antuk napi sané katunas olih kulawarga sané istri. Ring tradisi puniki, maskawin sané katunas, kapah dados makudang-kudang sarana sakadi piring miwah jinah. Sasampun napi sané katunas sampun sayaga, salanturnyané kalaksanayang sangkep kulawarga sané kaping kalih.[2]
Dudonan sané kaping kalih inggih punika, kulawarga sané lanang ngundang kulawarga sané istri ka jeronnyanné. Tetujonnyané inggih punika mangda kulawarga sané istri prasida nyingakin maskawin miwah arta brana sané sampun kasayagayang olih kulawarga sané lanang. Yéning maskawin taler arta brana sané sampun kapupulang sampun jangkep manut saking kulawarga sané istri, salanturnyané inggih punika ngarembugang indik galah upakara punika.
Upakara Misarayang Ararem
Wénten kalih parindikan sané mapaiketan sareng upakara misarayang ararem punika, inggih punika
- Yéning kulawarga sané istri mawit saking désa lianan, nika mawinan kulawarga lanang patut maktayang maskawin punika majeng ring kulawarga istri ka jeronnyané utawi ka genah sané sampun kacumpuang ritatkala pasangkepan sané kaping kalih. Ritatkala ka genah punika, kulawarga sané lanang patut kairingin olih makasami kulawarga sané wénten ring désannyané.
- Yéning kulawarga sané istri mawit saking désa sané pateh sareng kulawarga sané lanang, nika mawinan kulawarga sané lanang manten sané ka genah kulawarga sané istri. Nénten makasami kulawarga sané wénten ring désa punika patut nyarengin.
Upakara Ararem
Ritatkala maskawin punika kasarayang, kalaksanayang arak-arakan mawentuk barisan ageng sané kapah dados tigang pahan, inggih punika:
- Pahan sané kapertama inggih punika sang panglingsir ring kulawarga sané lanang. Makasami sané kadagingin olih anak-anak istri. Pahan sané kapertama puniki magenah ring barisan pinih ajeng. Pahan sané kapertama patut nganggén penganggé adat Biak tur makta piring-piring ageng. Ring basa Biak, piring-piring punika kawastanin "Ben be pon" sané maartos piring sané madué nilai lelintihan adat).
- Pahan sané kaping kalih inggih punika pahan campuran, inggih punika lanang tur istri. Pahan kaping kalih puniki dados pangater tur makta piring-piring alit pinaka nyangkepin arta brana tur akéh maskawin sané kasarayang.
- Pahan kaping tiga inggih punika para sekaa gegitan miwah musik sané kadagingin olih anak istri miwah lanang, tua tur muda. Pahan puniki mawentuk barisan sané kawastanin barisan pangater maskawin.
Ring upakara puniki kadagingin antuk makudang-kudang soroh gegendingan, alat musik, miwah tarian Yosim Pancar utawi Yospan. Tetujonnyané mangda ngicénin rasa unik majeng ring anak istri miwah lanang sané pacang mawiwaha. Sasampun barisan pangater rauh ring genah sané kacumpuang, salanturnyané nandatanganin warta upakara prabéya maskawin. Penandatanganan punika pinaka cihna upakara misarayang maskawin punika sampun puput.
Upakara Pangiringan
Sasampun nganyumpuang prabéya maskawin punika, salanturnyané kalaksanayang upakara Munara Yakyaker utawi upakara pangiringan salami pitung rahina tur pitung lemeng. Ring upakara puniki, makakalih sang sané pacang mawiwaha kaawasin ring jero kulawarga soang-soang. Salanturnyané, sang sané istri kairingin olih Wor, arak-arakan sané kasarengin olih sasolahan miwah gagendingan ka genah sang sané lanang. Ring genah sang sané lanang kalaksanayang upakara pangukuhan pinaka cihna pawiwahan punika sampun sah.[3]
- ↑ theAsianparent (2022-02-02). "Mengenal Ararem, Tradisi Mengantar Mas Kawin dari Papua". id.theasianparent.com (ring Indonesia). Kaaksés 2022-08-31.
- ↑ Arifa, Siti Nur. "Ararem, Tradisi Pengantaran Mas Kawin dan Makna Penting Piring Gantung di Papua". www.goodnewsfromindonesia.id (ring Indonesia). Kaaksés 2022-08-31.
- ↑ "ARAREM » Budaya Indonesia". budaya-indonesia.org. Kaaksés 2022-08-31.