Telaga Warna

**Telaga Warna (Puncak, Bogor)**
	Telaga Warna (Puncak, Bogor)
	; Pintu masuk kawasan wisata Telaga Warna
Informasi
Genah	Kawasan Puncak, Bogor, Jawa Barat.
Negara	Indonésia
Koordinat	6°42′07″S 106°59′46″E / 6.702°S 106.996°E
Soroh genah wisata	Danu
Fasilitas	• Genah outbond; • Track alam; • Shelter; • Pos jaga; • Pusat informasi; • Menara pengintai burung.

Telaga Warna inggih punika silih tunggil genah malancaran sané wénten ring wewidangan Puncak, Bogor, Jawa Barat. Objek wisata puniki nampek ring kebun téh PTP VII Gunung Mas. Ring wawengkon telaga puniki wénten carik miwah kampung kramané tur wénten gunung sané ngulangunin. Sadurung kadadosang taman wisata ring warsa 1972, wawengkon Telaga Warna Puncak Pass Cisarua - Bogor wantah pahan saking Kawasan Cagar Alam hutan Gunung Mega Mendung miwah hutan Gunung Hambalang.^[1]

Wawengkon Konsérvasi

Taman Wisata Alam Telaga Warna madué jimabr 5 ha sané katetapang manut saking S.K Menteri Pertanian Tanggal 9 Juni 1981 No. 481/Kpts/UM/6/81. Taman Wisata puniki wantah wawengkon konsérvasi sané kawigunayang antuk tetujon wisata utawi malancaran. Manut saking administrasi pamerintah, wawengkon Cagar Alam miwah Taman Wisata Alam Telaga Warna ngranjing ring kecamatan Cisarua, magenah ring kalih kabupatén inggih punika Bogor sareng Cianjur, propinsi Jawa Barat. Wawengkon konsérvasi sané mastatus daratan puniki madué jimbar makasami inggih punika 549,66 Ha. Wawengkon alam puniki tegehnyané sawatara 1.097-1.400 m dpl tur kakelilingin olih tebing sané abing. Wawengkon puniki manut saking géologi, kawentuk olih letusan Gunung Gedé Pangrango (1747 –1748) tur soroh batunné inggih punika batu beku vulkanik miwah soroh andésit miwah basalt. Telaga Warna jimbarnyané langkungan saking 7.156 m², dalemnyané 15 méter tur dalem ring tepinnyané sawatara 1-2 méter. Ring dagingnyané wénten lumpur miwah batu, tur taler wénten 13 soroh ulam.

Legenda Kawéntenan Telaga Warna

Manut saking krama irika, Telaga Warna wénten krana wénten anak istri sané manja ring kerajaan Kutatanggeuhan sané mawasta Putri Gilang Rukmini. Putri puniki nénten kayun kaicénin hadiah marupa kalung sané kakaryanin saking mas tur permata. Sang Ratu pedih krana putri sakadi punika. Makasami kramané nangis sané ngawinang istanané belus krana yéh mata. Yéh mata punika salanturnyané ngagengang tur ngawinang istanané banjir. Sagét wénten yéh sané metu saking tanah tur ngawinang istana Kutatanggeuhan tenggele tur dados danu sané ngulangunin. Ring rahina sané galang danu punika kacingakin mawarna-warni, warna punika mawit saking bayangan alas, bunga, miwah langit sané wénten ring sakeliling telagané. Nanging, wénten sané maosang warna punika mawit saking kalung putri sané kasebar ring dasar telagané.

Panorama

Telaga Warna madué warna permukaan yehnyané sané maubah-ubah, nika krana telaga punika kaentikin olih entik-entikan soroh gulma yeh (Najas Gramininae) sané akéh ring permukaan telaga. Matanai miwah gulma sané wénten ngawinang warnan permukaan telagané mauwah dados gadang muda, gadang tua, ngantos warna peteng. Niki mawinan akéh wisatawan sané malancaran irika. Irika taler wénten entik-entikan sané asli alas tropika pegunungan, makadi Puspa miwah Kihiur miwah entik-entikan tingkat rendah makadi Paku Tiang, Rame, dan Rotan. Para wisatawanné taler mrasidayang nyingakin beburonan irika sakadi macan tutul miwah babi hutan. Wénten taler soroh primata sané kalindungin sakadi kera abu-abu, surili, miwah lutung.

Kawéntenan Sarana Pariwisata

Wénten makudang-kudang sarana pariwisata sané kaaturang majeng ring para wisatawanné sané rauh, makadi:

Genah antuk outbond
Track alam
Shelter
Pos jaga
Genah informasi
Menara pengintai sané tegehnyané 13,5 meter antuk nyingakin kedis

Mangda prasida ka genah wisata punika, para wisatawanné mrasidayang nganggén kendaraan soang-soang miwah bus sané ka Wawengkon Puncak. Salanturnyané majalan ring jalan setapak ring tepi jalan Raya Puncak sawatara 10 menit

Pustaka

↑ Tahier, Siti Suryani; Haryani, Tri Saptari; Wiedarti, Sri (2020-01-03). "KEANEKARAGAMAN ANGGREK DI CAGAR ALAM DAN TAMAN WISATA ALAM TELAGA WARNA, PUNCAK, BOGOR". EKOLOGIA. 18 (2): 83–93. doi:10.33751/ekol.v18i2.1656. ISSN 2686-4894.

[1] Tahier, Siti Suryani; Haryani, Tri Saptari; Wiedarti, Sri (2020-01-03). "KEANEKARAGAMAN ANGGREK DI CAGAR ALAM DAN TAMAN WISATA ALAM TELAGA WARNA, PUNCAK, BOGOR". EKOLOGIA. 18 (2): 83–93. doi:10.33751/ekol.v18i2.1656. ISSN 2686-4894.

[1]