Tari Mejeng Besuko

Tari Mejeng Besuko inggih punika silih tunggil tari khas saking Sumatra Selatan sané katami saking dumun. Tari puniki kawastanin pinaka tari perjodohan, sané nyinahang rasa bagia truna-trunine rikala matemu. Tari mejeng besuko taler kadadosang pinaka piranti rikala pacang ngiket utawi manggihin pajatukarma. Cutetné tari puniki nyinahang teges kalih yowana sané nedeng mabunga-bunga rikala sampun kacumpuang patemon sareng kalih, pacang maduang tresna. Wiragané sané alus dabdab nyinahang panglilacita para yowana ring Sumatera Selatan. Nguni kocap tari puniki nénten nganggé gamelan utawi musik, sakéwanten sajeroning panglimbak aab jagat. mangkin sampun nglimbak kadagingin iringan gamelan mangda sida dahat ngulangunin Tari puniki ketah kanggén pinaka panyanggra tamiu agung, parikrama pawiwahan, miwah saluir parikrama agama.

Uger-uger

Uger-uger ring sasolahan puniki, katlatarang kadi sor puniki.

1. Sang pragina mangdané para yowana sané istri. Indiké punika sané nyinahang anak bajang truna kari kalulut asmara utawi tresna.
2. Wiraga miwah wirasa rikala ngigelang mangda sakadi anak sané sedek bagia rikala kajodohang.
3. Pragina sané nyolahang ketahnyané sareng lelima.

Runtutan Wiraga

1. Kapertama praginané ngawitin wiragan tari antuk makakalih tangan leser ka samping tengen, tangan kiwa ring arep tangkah, wiragan batis ka samping ping kalih, kalanturang antuk wiragan tungkalikanipun. Raris wiragan batis ka ajeng ping kalih, tangan tengen nglintang ka samping waduk, tangan kiwa ka duur, sirah nguntul, raris ka ungkur saha laksanayang gerakan tungkalikipun. Pragina sané kapertama raris meneng.
2. Pragina sané magenah ring tengah, ngawitin igelan sakadi pragina sané kapertama raris meneng.
3. Pragina sané wénten ring dérékan kaping ungkur ngawitin igelan sakadi pragina kapertama miwah kaping kalih, raris meneng.
4. Tangan tengen ka samping kiwa antuk wiragan batis kiwa ka samping kiwa ping kalih, kalanturang antuk kahanan tungkalikné. Pragina sinambi mamargi ka genah sané matungkalik sareng genah sadurungné.
5. Tangan tengen ka samping kiwa antuk wiragan batis kiwa ka samping kiwa ping kalih, kalanturang antuk kahanan tungkalikné. Tangan kiwa ka pala kiwa saha ngawit nyongkok.
6. Makakalih tangan leser ka sor sakadi nayung ka tengen miwah kiwa ngawit ngadeg, raris ngawit makecog ka tengen ping kalih asapunika taler tungkalikané.
7. Tangan kiwa ring arep tangkah, tangan tengen leser, kalanturang wiragan tungkalikanipun. Batis ka ungkur raris ka tengen. Tangan tengen ngigel. Raris telapang tangan tengen kapungkah ka ajeng antuk siku kabengkokang. Tangan kiwa leser ka sor. Batis ka tengen miwah kiwa.