Tari Kebalai

Tari Kebalai inggih punika igelan tradisional sané wit saking Roté Ndao, Provinsi Nusa Tenggara Timur. Dumun, igelan puniki kasolahang sawusan parikrama pemakaman adat. Tari kebalai punika pinaka silih tunggil panglila cita sané katurang majeng sang sané sedek mabela sungkawa, mawinan kulawarga sané katinggalin nénten setata ngrasayang duka sané dahat. Sajeroning panglimbak aab jagaté mangkin, igelan puniki nénten wantah kasolahang rikala wusan acara pemakaman kémanten, sakéwanten ketah taler kanggén sjaeroning parikrama panglilacita tiosan, minakadi acara adat, panyanggra tamiu, asapunika taler ring pamargin parikrama seni budaya. Tari kebalai ngranjing ring tari pergaulan utawi panglilacita sané ketah kasolahang masal olih kramané irika. Tari kebalai puniki maderbé piteket paiketan (persatuan kesatuan), punika kacihnayang antuk makasami pragina sané ngigelang mapaiketan saling nyokong ngibur silih tunggil krama sané sedek mabelasungkawa. Tiosan ring punika taler pinaka wadah utawi genah ngiket rasa sagilik-saguluk kramané sami.

Panganggé

Saluir soroh igel-igelan saking makudang genah utawi wewidangan pastika nganggé busana sané matiosan. Punika taler tari kebalai. Ring sor puniki katlatarang busana ring tari kebalai.

1. Panganggé tari kebalai inggih punika busana khas Roté Ndao.
2. Pragina sané lanang nganggén busana sakadi saput selempang, hafa, miwah habas. Tiosan ring punika, taler nganggén topong khas Rote Ndao sané mawasta Ti'i langga.
3. Pragina sané istri nganggé busana kain sarung, selempang, pendi, habas, miwah bula molik sané kanggén ring duur.

Wiraga (gerak)

1. Tari kebalai ketah nganggé gerak batis ka malu miwah dori saha kiwa tengen.
2. Gerak masareng-sarengan saking makasami praginané kaanutang ring wiraman syair utawi tembangné.
3. Ketahnyané pragina tari kebalai mapiteh manut utawi matungkalik arah jaum jam.
4. Yéning Manahelo jagi nembangang saluir tembang utawi syair sané mabinayan, Manahelo pacang ngicén pacihna (isyarat) inggih punika matembang sinambi ngucapang lengkara minakadi Tasafali dei, ita tasafali dei.
5. Manut pacihnan punika, pragina tari kebalai sayaga jagi nganutang igelan sareng tembang anyar sané katembangang olih Manahelo. Tembang sané kanggé ketah nganggén tembang dasar taler tembang variasi.
6. Yening pragina tari kebalai akéh sakéwanten genahné cupit, prasida ngaryanang formasi bunder alit ri tengahing bunderan ageng saha sinambi saling magisiang lima. Tari kebalai merluang dahat konsentrasi duaning saluir wiraganipun para praginané mangda sinarengan (kompak).