Tari Kanja

Tari Kanja inggih punika sasolahan tradisional saking Bima. Tarian Kanja pinaka tarian klasik istana sane karipta olih Sultan Abdul Kahir Sirajudin duk warsa 1673 risampune Islam ngranjing ring Bima. Tari Kanja kasolahang olih 4-6 pragina lanang. Kanja maartos tantangan, sane nyihnayang panglima perang sane gagah berani nglawan tantangan ring medan laga.

Soroh

Tari Kanja wenten kalih soroh inggih punika Kanja Rato Renda utawi Kanja Kese miwah Kanja Ncau utawi Kanja Dua (Duel).

Kanja Rato Renda kasolahang olih pragina antuk gerakan sane sadarana miwah sasolahan puniki nyihnayangan kesigapan panglima perang sajeroning ngamargiang amongan pinaka pengawal. Kanja Ncau kasolahang olih kalih pragina antuk gerakan sane lebih bervariasi saking Kanja Rato Renda. Kanja Ncau nyihnayang perang tanding utawi duel ring kalih panglima perang minakadi peristiwa sejarah sane ngawinang sasolahan puniki karipta. Peristiwa inucap ring warsa 1630 Masehi daweg runtuhnyane Kerajaan Bima utawi ngawit ngranjingnyane Agama Islam ring Tanah Mbojo.

Kawigunan

Ring masa kesultanan, makakalih tari Kanja puniki wantah kasolahang ring ajeg istana Kesultanan Bima, nyabran upacara adat U-a Pua, miwah kasolahang olih para panglima perang utawi sane ngangganin. Sakewanten ring panglimbaknyane mangkin, makakalih sasolahan puniki wantah pinaka seni pertunjukkan sane kasolahang ring panggung utawi ring lapangan mawentuk arena, sajeroning ngameriahang upacara-upacara adat minakadi khitanan, pawiwahan, syukuran, miwah sane tiosan. Sering taler kasolahang sajeroning ngameriahang ritatkala mikelingin hari besar nasional utawi daerah miwah nyambrama utawi ngibur para tamiu resmi sane rauh ka Kabupaten Dati II Bima.