Tari Cangget

Tari Cangget inggih punika silih tunggil sasolahan sané kadruénang olih krama Lampung sané maadat pepadun. Tari Cangget ketahnyané kasolahang tur dados pahan saking dudonan upakara adat utawi begawi sané kalaksanayang antuk nyanggra pésta daur idup sakadi pawiwahan ring krama Lampung Pepadun. Cangget prasida kaartosang pinaka sasolahan sané kasolahang olih para istri, nanging cangget taler dados kaartosang parikrama begawi sané wénten irika. Begawi miwah cangget mapaiketan tur nénten prasida kapasahang.

Soroh Sasolahan Cangget

1. Cangget Nyamuk Temui, sasolahan sané kasolahang olih para yowana ring upakara nyanggra tamiu ageng sané rauh ka genahnyané.
2. Cangget Bakha, sasolahan puniki kasolahang olih para yowana ring bulan purnama utawi sasampun panén (upakara panén raya).
3. Cangget Penganggik, sasolahan puniki kasolahang ri tatkala wénten anggota anyar utawi wénten yowana sané mauwah statusnyané saking anak alit dados anak kelih. Status punika mauwah sasampun nglaksanayang upakara busepei (kikir gigi).
4. Cangget Pilangan, sasolahan pinih untat majeng ring daha sané pacang mawiwaha, krana sasampun mawiwaha, anak istri punika nénten malih dados masolahan.
5. Cangget Agung, sasolahan sané kasolahang ri tatkala wengi utama saking dudonan upakara adat utawi gawi adat, ketahnyané ring upakara Begawi Cakak Pepdun utawi wénten krama penyimbang sané menék tahtannyané.

Soroh Pakem Sasolahan

Pakem gerak saking tari puniki nénten méweh tur nénten madué gerak sané khusus, nika mawinan pola geraknyané mabinayan ring siki sasolahan miwah ring sasolahan sané lianan. Sakéwala, ketahnyané pola gerak tari puniki kapah dados makudang-kudang gerak, makadi kenuy ngelayang, tutup malu, ukel kilat mundur, miwah ngecum. Akéh gerakan sané ngutamayang gerak ring tangan kémanten. Kenuy ring basa Lampung madué artos kedis sikep, tur ngelayang inggih punika ri tatkala kedis sikep makeber nénten ngabkabang kampidnyané. Pola gerak sané wénten inggih punika ngembangan tangan tur kaayunang ka ajeng tur ka untat, sakadi kedis sikep. Para krama Lampung precaya, kedis sikep pinaka buron sané kawangiang tur pinaka cihna saking jagat ajeng.

Pangangge Sasolahan

1. Kain tapis
2. Kebaya mawarna putih
3. Siger
4. Gelang kedis
5. Gelang ruwi
6. Gelang kano
7. Kalung papan jajar
8. Bulu seretei
9. Tanggai
10. Peneken
11. Anting-anting
12. Kaos kaki mawarna putih

Sarana Sasolahan

1. Talam Bekukut, inggih punika naré mawentuk bunter sané kakaryanin saking kuningan utawi perungggu sané madué tumbu ring sornyané. Talam bekukut madué artos talam macokor. Talam puniki kasayagayang antuk anak istri sané pacang mawiwaha, anak istri punika pacang masolahan ring ajengnyané.
2. Tombak miwah keris, ri tatkala tari Igel/Igol
3. Jepana (tandu), sané kaanggén ri tatkala ngiringang tur mendak tamiu ageng miwah penyimbang.
4. Pajeng adat putih pinaka cihna kasucian miwah kuning pinaka cihna kaagengan.

Musik Pangiring

Tari Cangget kairingin olih sarana alat musik tradisional Lampung sané kawastanin tala balak. Tala balak punika madué limang soroh instrumén sané ring soang-soangnyané maduén wasta, inggih punika gelittak 1 buah, kelittang 12 buah, rujih 2 buah, canang (petuk) 1 buah, miwah tala balak 2 buah, tur tala lunik 1 buah. Musik sané kasolahang saking instrumén tala balak puniki kawastanin tabuhan. Wénten makudang-kudang sarana sané dados pangiring Tari Cangget, inggih punika:

1. Tabuh Takhi (Tari)
2. Tabuh Mirul Bekekes
3. Tabuh Gupek