Tari Bidu

Tari Bidu wit saking Propinsi Nusa Tenggara Timur, pamekasnyane ring wawidangan Belu. Tari Bidu katamiang turun temurun pinaka sasolahan ngrereh jodoh. Sasolahan puniki kasolahang olih teruna miwah teruni irika. Sajeroning tradisi Belu, wenten makudang-kudang tahap sane patut kamargiang olih teruna-teruni sadurung mawiwaha. Para teruna-teruni patut ngamargiang Hameno Bidu, inggih punika perjanjian miwah pangrancana. Raris, teruna-teruni saling matemu ring genah tari Bidu jagi kamargiang. Ring sasolahan punika para teruna masolah saka siki sinambi milih teruni sane katresnain. Risampune pada igum, raris kamargiang Hanimak. Hanimak inggih punika proses pengenalan teruna miwah teruni antuk ijin saking rerama. Risampune cocok, raris ngranjing ka proses Binor, saling tukar miwah nyimpen barang-barang minakadi kain, busana, miwah sane tiosan. Sajeroning mapadik, ketahnyane makta barang sane kabaos Mama Lulik sane kalanturang antuk Mama Tebes. Mama Tebes artosnyane ngrancananyang pawiwahan.

Gerak

Tari Bidu kasolahang olih pragina istri miwah lanang antuk akehnyane kutus utawi lebih pragina istri miwah 1-2 pragina lanang. Pentas tari kakawitin pragina istri nyuguhang base miwah buah majeng para pamiarsa utawi tamiu sane kaping singgih sane rauh. Gerakan tangan pragina istri pinih lembut miwah mamargi ring genah. Sakewanten pragina lanang nglilingin pragina istri antuk gerakan sane khas. Gerakan pragina istri nyihnayang keanggunan puteri miwah pragina lanang nyihnayang anak sane sampun sayaga milih calon rabi.

Busana miwah Alat Musik

Pragina istri nganggen kain sarung panjang saking dada ngantos cokor. Tiosan punika taler nganggen pangiket duur, kalung, sabuk, miwah gelang. Pragina lanang nganggen baju lengen panjang miwah kain selampang ring duur, sarung ring sor, taler paniket duur khas Belu.

Alat musik pangiring tari Bidu inggih punika biola, sasando, miwah gitar antuk irama bertempo cepat. Iringan musik inucap kapaduang antuk tembang adat khas Belu.