Tari Bidadari Terminang Anak
Tari Bidadari Terminang Anak inggih punika sasolahan tradisional sane wit saking Rejang Lebong, Propinsi Bengkulu.[1] Sasolahan puniki sering kasolahang ring akeh acara minakadi nyambrama tamiu, upacara pawiwahan, miwah akeh acara tiosan. [2]
Tari Bidadari Terminang Anak utawi ring basa Bengkulu taler kabaos Bidadei Teminang inggih punika sasolahan sane nyihanayang widiadari jegeg sane tedun saking langit nuju ka gumine jagi nunas anak alit. Sasolahan puniki ketah kasolahang olih anak istri, antuk silih tunggilnyane nganggen busana sane matiosan. Pragina antuk busana sane matiosan pinaka cihna anak alit saking gumi sane kangkat pinaka pianak olih widiadari. Minakadi sasolahan-sasolahan tradisional ring Indonesia sane nyaratang makna miwah filosofi, Tari Bidadari Terminang Anak taler madue makna inggih punika rejeki sane rauh saking langut mantuk jadma ring gumi. [2]
Busana miwah Properti[uah | uah wit]
Para pragina ring Tari Bidadari Terminang Anak nganggen busana marupa busana khas anak istri ring Bengkulu kajangkepin antuk senteng. Tiosan punika para pragina taler nganggen payasan ring duur. Ketahnyane sajeroning Tari Bidadari Terminang Anak para pragiannyane nganggen busana sane mawarna cerah. Para pragina ring Tari Bidadari Terminang Anak taler kajangkepin aksesoris. Busana para pragina sane kapanggih ramia pinaka gegambaran sakayan miwah karakter sane kaduenin olih Rejang Lebong. [2]
Gerakan[uah | uah wit]
Gerakan sane kasolahang ring Tari Bidadari Terminang Anak pinih dinamis, harmonis, miwah ritmis. Sakewanten aab jagate ngawinang gerakan ring Tari Bidadari Terminang Anak puniki taler ngalamin panglimbak mangda kacingak sayan becik. Sakewnaten yadiastun kenten pawewehan gerak puniki nenten ngilangin gerakan lami miwah tetep nganutin makna awal sasolahan puniki.
Musik Pangiring[uah | uah wit]
Iringan musiknyane, Tari Bidadari Terminang Anak nganggen iringan musik khas wawidangan Rejang Lebong. Pateh minakadi gerakan sasolahannyane, manut panglimbaknyane iringan musik sajeroning Tari Bidadari Terminang Anak taler ngalamin panglimbak miwah paweweh, nyantos suasana sasolahan manados sayan meriah.[2]
Panglimbak[uah | uah wit]
Sajeroning panglimbaknyane, kantos mangkin Tari Bidadari Terminang Anak kantun kalestariang ring wawidangan Propinsi Bengkulu. Tari Bidadari Terminang Anak sering kasolahang sajeroning akeh acara minakadi nyambrama tamiu, upacara adat, resepsi pawiwahan utawi ring acara pentas seni. [2]
Tiosan punika, mangda sasolahan puniki tetep lestari, nenten kidik taler sekolah-sekolah miwah sanggar tari ring Propinsi Bengkulu sane ngajahin Tari Bidadari Terminang Anak majeng murid-muridnyane. Antuk punika pangaptinnyane mangda prasida manados penerus sana ngupapira Tari Bidadari Terminang Anak ring masa sane jagi rauh. [2]
Pustaka[uah | uah wit]
- ↑ "6 Tari Tradisional dari Bengkulu Dilengkapi Penjelasan". Blog Mamikos (ring Indonesia). 2023-01-30. Kaaksés 2023-03-07.
- ↑ 2,0 2,1 2,2 2,3 2,4 2,5 "Asal-usul dan Sejarah Tari Bidadari Teminang Anak - Sering Jalan". seringjalan.com. Kaaksés 2023-03-07.