Taluh penyu

Saking Wikipédia
(Kagingsirang saking Taluh Penyu)
Taluh penyu
Jaja taluh penyu saking Pasar Mas, Gianyar.
TipéJaja
Sajianasiki
Mawit sakingIndonésia
Wawengkon utawi wewidanganBali
Paiketan ajengan nasionalIndonésia
Suhu penyajiandingin
Lakaran utamatepung baas ketan, yéh, uyah, miwah yéh pandan

Taluh penyu inggih punika silih tunggil sanganan Bali. Jaja puniki wentuknyané bunter-bunter sakadi taluh penyu. Nika mawinan kawastanin jaja taluh penyu. Jaja taluh penyu ketahnyané mawarna gadang sané malakar aji yéh pandan. Jaja taluh penyu malakar aji tepung baas ketan, yéh, uyah, miwah yéh pandan sané kaanggén lapisan di sisi. Yéning lapisan di tengahnyané sané mawasta unti malakar aji nyuh sané makikih, gula Bali, uyah, yéh, miwah don pandan. Tiosan punika, jaja puniki kataburin antuk tepung baas ketan sané kacampur don pandan. Bahan tabur puniki sané ngaryanin jaja taluh penyu rupannyané masaih tekén jaja mochi. Nanging binannyané, jaja mochi madaging kacang tanah.

Tata cara ngaryanin jaja taluh penyu inggih punika sané kapertama ngaryanin unti. Nyuh sané makikih kacampur gula Bali, uyah, yéh miwah don pandan tur kamasak kantos lebeng tur kadinginin. Lantas tepung baas ketan miwah don pandan kasangrai. Tepung sané sampun kasangrai kakepah dados kakalih, sané asiki kaanggén bahan tabur, asiki malih kaanggén lapisan di sisi. Tepung sané kaanggén lapisan di sisi kacampur yéh, uyah, miwah yéh pandan kantos kalis. Yéning sampun kalis, adonan punika kakukus salami limolas menit. Adonan sané sampun lebeng kadagingin unti tur kawentuk bunter-bunter lantas kataburin tepung baas ketan. Jaja taluh penyu makéh kaadol ring pasar tradisional.[1]

Pustaka[uah | uah wit]

  1. "Jaja Taluh Penyu khas Bali". cookpad.com. Kaaksés 17 January 2020.