Subak Gedé Langkih
| Subak Gedé Langkih | |
|---|---|
| Désa | Tegallalang |
| Kecamatan | Tegallalang |
| Kota | Kabupatén Gianyar |
| Jimbar | 200 ha (490 ékar) |
Subak Gedé Langkih inggih punika silih tunggil subak sané wénten ring Bali. Subak puniki magenah ring Désa Tegalalang, Kecamatan Tegalalang, Kabupatén Gianyar, Bali. Jimbar subak Gedé Langkih wantah kirang langkung 200 hektar. Subak puniki wantah angkepan saking limang subak sané soang-soangnyané madué jimbar kirang langkung 40 hektare. Sadurungnyané subak puniki marupa tempekan utawi sekaa. Krama pangempon subak Gedé Langkih inggih punika krama saking limang banjar sané wénten ring wewidangan subak. Subak puniki wantah soroh subak basah sané parikramané wantah nandur padi kémanten.
Subak Gedé Langkih wantah subak ageng sané marupa angkepan saking limang subak. Limang subak puniki madué soang-soang pekaseh sané ngelola subak. Ring sor puniki subak miwah wastan pekaseh :
- Subak Sukabaya : Ketut Merta
- Subak Langkih : Ketut Ardita
- Subak Uma Dalem : Ketut Suarsa
- Subak Telun Ayah : Wayan Samba
- Subak Kraman : Ketut Meres
Subak madué manggala utawi pamucuk sané kawastanin Kelian Subak. Kelian Subak Gedé Langkih mawasta Madé Bawa. Kelian Subak puniki madué swagina ngawasin miwah mengelola subak. Tiosan punika, Kelian Subak sané ngatur pengelolaan toya manut ring awig-awig sané sampun kacumpuang sareng krama subak drika.
Subak wantah sistem irigasi toya sané wénten ring Bali. Pahpahan toya sané wénten ring Subak Gedé Langkih inggih punika manut saking jimbar tanah sané kadruwénang. Subak Gedé Langkih ngamolihang pahan toya akéhnyané 450 bit, sane pahpahan limang subak soang-soang ngamolihang 90 bit toya. Soang-soang petak tanah polih 1 bit utawi 4 jriji.
Pikobet sané kapolihang ring wewidangan Subak Gedé Langkih inggih punika wénten saluran sané bedah sawiréh hama sakadi yuyu. Wénten hama sané ngulgul padi sakadi wereng, bikul, miwah kedis. Hama puniki ketah kawastanin OPT (Organisasi Pengganggu Tanaman). Sarana sané kaanggén ngusir hama puniki wantah nganggén panyemprotan, pangopyokan miwah rambatan.