Seblang
Ritual Seblang inggih punika silih tunggil upakara krama Osing sané wénten ring kalih désa ring kecamatan Glagah, Banyuwangi, inggih punika désa Bakungan miwah Olehsari.[1] Ritual puniki kalaksanayang antuk mersihang désa tur namplik bala, mangda désané tetep rahayu. Upakara puniki masaih sareng ritual Sintren ring wewengkon Banyumas miwah Cirebon, utawi Sanghyang Dedari ring pulo Bali.
Upakara tari Seblang ring kalih désa punika malianan galahnyané, ring désa Olehsari kalaksanayang aminggu sasampun Idul Fitri tur sang sané nyolahang inggih punika daha, yéning ring désa Bakungan sané nampek, kalaksanayang aminggu sasampun Idul Adha tur sang sané nyolahang inggih punika anak istri sané sampun menopouse. Lianan saking punika, makakalih désa puniki pateh nglaksanayang upakarannyané salami pitung rahina tur sang sané masolah karauhan. Para pragina punika kapilih olih anak sané ketah kawastanin Gambuh utawi pawang, tur para pragina patut saking pratisentana seblang sadurungnyané.
Lelintihan[uah | uah wit]
Seblang sampun wénten ring Olehsari saking warsa 1930, nanging kaprecaya tari puniki sujatinnyané pinaka sasolahan sané sampun kuno, mayusa panyatusan warsa, nika mawinan nénten wénten sané uning indik wit lelintihannyané. Wénten silih tunggil téori saking Semi, sané taler dados pelopor tari Gandrung istri pinih kapertama (padem ring warsa 1973). Teori puniki nénten prasida kabuktiang kapatutannyané. Semi kadadosang seblang ri tatkala kantun alit ngantos dados truna tur dados pragina Gandrung.
Tari Seblang puniki kakawitin antuk sang Gambuh utawi pawang. Para pragina nutupin panyingakannyané olih para biang ring untatnyané sinambi makta tempeh (naré saking tiing). Salanturnyané sang pawang ngasepin para pragina nganggén dupa sinambi maca mantra. Sasampun para pragina karauhan sané kacihnayang saking runtuh, salanturnyané upakara kakawitin. Para pragina punika masolah antuk panyingakannyané matutup tur nyarengin pawangnyané miwah irama gending sané kasuarayang. Para pragina ketahnyané ngiterin désa sinambi masolah. Sasampun makudang-kudang galag masolah, para seblang ngentungang sentengnyané sané sampun kagulung ka para pamiarsa, yéning wénten sané kena senteng punika, anak punika patut sareng masolah nyarengin sang seblang. Yéning nénten prasida, anak punika pacang kauber ngantos kayun sareng masolah.[2]
Musik Pangiring Sasolahan[uah | uah wit]
Musik pangiring Seblang inggih punika kendang asiki, kempul utawi gong asiki miwah kalih saron. Yéning ring Olehsari kawewehin antuk biola pinaka efek musikal.[3]
Panganggé Sasolahan[uah | uah wit]
Panganggé pragina Seblang ring Olehsari miwah Bakungan akidik mabinayan, khususnyané ring pahan omprog utawi mahkota, baju, miwah senteng. Para pragina Seblang ring désa Olehsari, omprog ketahnyané kakaryanin saking gedebong sané kasuwir ngantos nutupin prarai praginané, ring pahan ajengnyané kawewehin sekar sané ketahnyané kapolihang saking tegal utawi ring wewengkon sétra, tur kawewehin kaca alit sané kagenahang ring madyan omprogé. Baju mawarna gadang ngantos kuning tur sentengnyané kagenahang ring bangkiang para praginané.
Para pragina seblang ring wewengkon Bakungan, omprog sané kaanggén kakaryanin saking kain kaffan sané kasuwir ngantos nutupin prarai praginané, tur ring ajengnyané kadagingin sekar saking sétra. Bajunnyané mawarna kuning tur barak. Lianan saking madaging unsur mistik, ritual Seblang puniki taler prasida dados hiburan majeng ring para kramané irika krana madaging adegan sané banyol.
Pustaka[uah | uah wit]
- ↑ Media, Kompas Cyber (2022-09-20). "Tari Seblang: Tujuan, Penari, Gerakan, dan Properti Halaman all". KOMPAS.com (ring Indonesia). Kaaksés 2023-06-12.
- ↑ "Banyuwangi Jalan Jalan". banyuwangitourism.com. Kaarsipin saking versi asli tanggal 2023-06-12. Kaaksés 2023-06-12.
- ↑ "MENGENAL RITUAL TARI SEBLANG YANG MISTIS". BANYUWANGI BAGUS (ring indonesian). Kaaksés 2023-06-12.CS1 maint: unrecognized language (link)